"მანჩესტერ იუნაიტედის" მწვრთნელმა ჟოზე მოურინიომ დავიდ დე ხეას გადასვლა სხვა კლუბში გამორიცხა, რადგან პორტუგალიელი გუნდის ლიდერებთან განშორებას არ აპირებს.
27 წლის დე ხეამ 2015 წელს "იუნაიტედთან" ახალი ხელშეკრულება გააფორმა მას შემდეგ, რაც მადრიდის "რეალში" მისი ტრანსფერი არ შედგა.
ესპანელის მოქმედი კონტრაქტი მომდევნო სეზონის ბოლოს იწურება, მაგრამ "იუნაიტედს" შეთანხმების დამატებით ერთი წლით გახანგრძლივების პერსპექტივა აქვს და მოურინიომ მიმდინარე წლის დასაწყისში მიანიშნა, რომ დავიდი ამ პუნქტის ამოქმედების წინააღმდეგი არ არის.
"ნიუკასლთან" მატჩის წინ მოურინიოს დე ხეას შესაძლო ტრანსფერის შესახებ ჰკითხეს, რაზეც მარტივად უპასუხა:
"თქვენ გგონიათ, რომ კლუბი, რომელიც მსოფლიო დონის ფეხბურთელების შეძენას ცდილობს, თავისი საუკეთესო ფეხბურთელების გაყიდვის ვარიანტს განიხილავს? სრული სისულელეა.
თუკი გვინდა უმაღლეს დონეზე ასვლა, ისეთი ფეხბურთელები უნდა გადმოვიბიროთ, როგორებიც ალექსისი, მატიჩი და პოგბა და ა.შ. არიან, ჩვენი ლიდერები კი არ უნდა გავყიდოთ".
მედიაში ასევე იწერება, რომ ზინედინ ზიდანმა თავისი ყურადღება ტიბო კურტუასკენ მიმართა, რომელმაც ბოლო დღეებში განაცხადა, რომ მისი გული მადრიდშია. მაგრამ მოურინიომ ამაზე ლაპარაკი არ ისურვა.
"კურტუას შესახებ მე ვერ ვისაუბრებ", - დაასრულა მწვრთნელმა.