ჰენრიხ მხითარიანი აცხადებს, რომ არსენ ვენგერსა და ჟოზე მოურინიოს შორის განსხვავება მათი ტემპერამენტია.
სომეხმა ფეხბურთელმა გასულ წელს წარმატებულად ასპარეზობის შემდეგ "მანჩესტერ იუნაიტედში" მიმდინარე სეზონის პირველი ნახევარი ჩააგდო, რის შემდეგაც "არსენალში" გადაბარგდა.
მოურინიომ კი სანაცვლოდ მიიღო ალექსის სანჩესი, რომელსაც თავის მხრივ "მეთოფეთა" რიგების დატოვება სურდა.
ორივე ფეხბურთელმა დაუყოვნებლივ მოახერხა ახალ გუნდში თავის დამკვიდრება და თუკი სანჩესმა თავის მეორე მატჩში გაიტანა გოლი, პირველში კი საგოლე გადაცემა გააკეთა, მხითარიანმა "ევერტონთან" შეხვედრაში სამი გოლი გაატანინა თავის თანაგუნდელებს, თუმცა მომდევნო შეხვედრა "უემბლიზე" "ტოტენჰემის" წინააღმდეგ, ცუდად ჩაატარა.
SFR Sport-ისთვის მიცემულ ინტერვიუში ჰენრიხმა განაცხადა, თუ რა განასხვავებს "იუნაიტედისა" და "არსენალის" მწვრთნელებს ერთმანეთისგან. "მოურინიო ძალიან ბევრს ითხოვდა ფეხბურთელებისგან. მასთან მუშაობა ძალიან რთული იყო. არსენ ვენგერი კი უფრო მეგობრულია, ესმის და ფიქრობს ფეხბურთელთა მდგომარეობაზე, უფრო მშვიდია. ეს არის განსხვავება.
ვფიქრობ, მანჩესტერში მაინც მოვახდინე შთაბეჭდილება, მიუხედავად იმისა, რომ სირთულეებს წავაწყდი.
წელიწადნახევარში სამი ტიტული მოვიგეთ, ამას კი ბევრი გუნდი ვერ ახერხებს.
ევროპა ლიგის ფინალი მოვიგეთ და გოლი გავიტანე. ხალხი თუ იტყვის, რომ იქ წარმატებას ვერ მივაღწიე, ეს მათი აზრია, მაგრამ მე ასე არ ვფიქრობ", - განაცხადა "იუნაიტედის" ყოფილმა ფეხბურთელმა.