ენტონი მარსიალი იმედოვნებს, რომ თავის შთამბეჭდავ ფორმას შეინარჩუნებს, რაც მიმდინარე სეზონში თვის საუკეთესო ფეხბურთელის ჯილდოს მოპოვებაში სამჯერ დაეხმარა.

ფრანგი შემტევი "იუნაიტედის" გულშემატკივარმა იანვრის საუკეთესო ფეხბურთელად დაასახელა, მანამდე კი მარსიალმა აღნიშნული ჯილდო სექტემბერსა და ოქტომბერში მოიგო.

მარსიალმა გულშემატკივართა არჩევანს დიდი პატივი უწოდა და იმედი გამოთქვა, რომ შემდეგში უფრო მეტ გოლს გაიტანს.

"ახლა თავს მართლაც კარგად ვგრძნობ. ბევრს ვვარჯიშობ და სიმართლე რომ ვთქვათ, ახალი წელი მართლაც კარგად დავიწყეთ და იმედი მაქვს, ასეც გაგრძელდება.

ჩემთვის დიდი პატივია, რომ გულშემატკივრებმა ხმა მე მომცეს. თუ სწორად მახსოვს, ამ სეზონში უკვე მესამე შემთხვევაა. იმედი მაქვს, ამ სერიას არ შევწყვეტ და რამდენიმეჯერ კიდევ მოვიგებ".

წინ "იუნაიტედს" გადატვირთული გრაფიკი აქვს - პრემიერ ლიგის ეგიდით ვიზიტი "ნიუკასლთან", ინგლისის თასის ეგიდით ვიზიტი "ჰადერსფილდთან" და ჩემპიონთა ლიგის ეგიდით გასვლითი მატჩი "სევილიასთან".

"ყველას მოგვწონს ყოველ მესამე დღეს თამაში, ახლა ესაა უმაღლესი დონის ფეხბურთი. ყოველთვის მზად ვარ და რაც უფრო მნიშვნელოვანია, საკმარისად დიდი შემადგენლობა გვყავს იმისათვის, რომ მატჩების ასეთ რაოდენობას თავი გავართვათ, ასე რომ, წინ ამაღელვებელი პერიოდია".