შვედეთში, "იუნაიტედის" თავდამსხმელ ზლატან იბრაჰიმოვიჩზე, ბიოგრაფიული ხასიათის ფილმის გადაღება იგეგმება. ამის შესახებ, შვედ პროდიუსერმა მატიას ნიორბორგმა ისაუბრა და განაცხადა, რომ ფეხბურთელზე კინოინდუსტრიას კიდევ ერთი ახალი ფილმი შეემატება, სადაც აღწერილი იქნება ზლატანის ცხოვრების მნიშვნელოვანი დეტალები.
ფილმი ზლატანის ცნობილი წიგნის "მე ზლატან იბრაჰიმოვიჩი" სცენარით წარიმართება. ტელეეკრანებზე წარსადგენად ეს ფილმი კი დაახლოებით 5 მაისისთვის იქნება მზად. პროექტის ღირებულება 5 მილიონ ევროს შეადგენს. საინტერესოა ის ფაქტიც, რომ ფილმის ერთ-ერთი პროდუსერი თავად იბრაჰიმოვიჩიც იქნება.
შეგახსენებთ და გეტყვით, რომ ამჟამად იბრაჰიმოვიჩი მოედანზე დაბრუნებას ვერ ახერხებს. მუხლზე გადატანილი მძიმე ტრავმის შემდეგ, მცირე ხნით შეძლო გუნდის შემადგენლობაში დაბრუნება, მაგრამ ტრავმა ბოლომდე მოშუშებული არ აღმოჩნდა და დიდებული შვედი ფეხბურთელი ისევ "წითლების" ლაზარეთში მოხვდა. გავრცელებული ინფორმაციებით ის მოედანზე დაბრუნებას მალე შეძლებს.