"მანჩესტერ იუნაიტედმა" ხუან მატას კონტრაქტში არსებული პუნქტი გამოიყენა და ესპანელ ფეხბურთელს მოქმედი კონტრაქტი დამატებით ერთი წლით, 2019 წლის ივნისამდე გაუხანგრძლივა.

ჟოზე მოურინიომ მიმდინარე თვეში არაერთხელ ისაუბრა მატას მნიშვნელობაზე და ასევე მოიქცა ორშაბათს
"ტოტენჰემთან" მატჩის წინა პრესკონფერენციის გამართვისასაც.

"მატა ძალიან მნიშვნელოვანია. წელიწადნახევრის წინ რომ მოვედი, ხალხი ამბობდა, "მატას პრობლემები ექნება, პრობლემები და მხოლოდ პრობლემები", მაგრამ ის კონტრაქტის ერთი წლით გახანგრძლივებას იღებს ჯილდოდ. მნიშვნელოვანი ფეხბურთელია ჩემთვის, კლუბისთვის და სხვა ფეხბურთელებისთვის" - განაცხადა მოურინიომ.

თავად ფეხბურთელმა კი კლუბის ტელეარხისთვის მიცემულ ინტერვიუში თავისი გრძნობები არ დამალა:

"ჯერ კიდევ ბედნიერად და ამაყად ვგრძნობ თავს, რომ ამ კლუბის წევრი ვარ. ჩემი აზრით, ყველა, ვინც "მანჩესტერ იუნაიტედთან" არის კავშირში, თავს პრივილეგირებულად უნდა თვლიდეს და მე სწორედ ასე ვარ.

კლუბში მყოფი თითოეული ადამიანით ვარ კმაყოფილი და, რა თქმა უნდა, მწვრთნელითა და თანაგუნდელებითაც. როგორც კი ამ საფეხბურთო კლუბის წევრი ხდები, შენი კარიერა იგივე აღარ არის, იცვლება, რადგან ეს მსოფლიოს ერთ-ერთი უდიდესი კლუბია. ყოველდღე ვახსენებ ჩემს თავს, როგორ გამიმართლა და რა იღბლიანი ვარ, ყოველი სავარჯიშო სესიისგან სარგებლის პოვნას ვცდილობ და ვცდილობ დავინახო, რა მნიშვნელოვანი მოვლენაა "მანჩესტერ იუნაიტედის" ფეხბურთელობა".

მატა "იუნაიტედში" 2014 წლის იანვარში "ჩელსიდან" შეუერთდა და მან 172 მატჩი ჩაატარა "წითლების" რიგებში, რომლებშიც 39 გოლი გაიტანა. "ოლდ ტრაფორდზე" ყოფნისას გულშემატკივართა შორის პოპულარულმა მატამ ლიგის თასი, ინგლისის თასი და ევროპა ლიგა მოიგო, ფანებს კი იგი მუდამ ემახსოვრებათ 2015 წელს "ლივერპულის" კარში გატანილი ფანტასტიკური გოლით.

"რვა, ათი, თორმეტი წლის ასაკში ვერასოდეს წარმოვიდგენდი, რომ ასეთ დიდ კლუბში ვითამაშებდი. მახსოვს დიდი ფეხბურთელები - სქოულზი, გიგზი, ბექჰემი, ვან ნისტელროი, ფერდინანდი, ვიდიჩი - და მაშინ მეგონა, რომ მათგან ძალიან შორს ვიყავი, მაგრამ ახლა აქ ვარ და განსაკუთრებული შეგრძნება მაქვს.

ჩემი აქ ყოფნის 4 წლის განმავლობაში ბევრი ახალი ფეხბურთელი შევიძინეთ, მაგრამ ახლა ერთმანეთს ვიცნობთ და ერთმანეთის უკეთ გვესმის. ჩვენ ვაყალიბებთ სტაბილურობას, რაც საჭიროა შედეგისა და ტიტულების მიღების თანმიმდევრულობისთვის".