ჟოზე მოურინიო პარასკევს ძლიერ შემადგენლობას გაიყვანს ინგლისის თასის მეოთხე რაუნდში "იოვილ თაუნთან" მატჩში, თუმცა მან არ დაადასტურა, რომ ალექსის სანჩესი აუცილებლად სასტარტო შემადგენლობაში დაიწყებს თამაშს.
ჩილელმა ფეხბურთელმა "არსენალიდან" "იუნაიტედში" თავისი ტრანსფერი ორშაბათს დაასრულა და ხვალ ინგლისის თასზე თამაშის უფლება აქვს, ვინაიდან "მეთოფეთა" მატჩი "ნონტინგემ ფორესტთან" მან გამოტოვა.
გულშემატკივარი მოუთმენლად ელის ახალი შვიდიანის გამოჩენას მოედანზე, მაგრამ პორტუგალიელმა სპეციალისტმა მათ ჩილელის თამაშის გარანტია ვერ მისცა.
"ჩვენ გამარჯვება გვსურს. ჩვენ ვიცით, რასაც ნიშნავს თასები. "მანჩესტერ იუნაიტედმა" რამდენიმე წლის წინ ითამაშა "იოვილში" და სირთულეს შესანიშნავად აცნობიერებს.
სწორედ ამიტომ, ძალიან ძლიერი გუნდი უნდა ვათამაშოთ. რამდენიმე ფეხბურთელი დაისვენებს; ჩვენ ასევე გვაქვს რამდენიმე პრობლემა, რომელთა თავიდან არიდებაც გვინდა და ეს პრობლემები თებერვალში გასამართი სათასო, საჩემპიონატო და ჩემპიონთა ლიგის მატჩებია. მაგრამ ამჯერად ძალიან ძლიერ გუნდს გავიყვანთ", - განაცხადა მოურინიომ.
მოურინიოს თქმით, სანჩესი განაცხადში იქნება და იმედოვნებს, რომ "ბარსელონას" ყოფილი ფეხბურთელი გუნდს ახალ მუხტს შესძენს იმ მწვერვალზე დასაბრუნებლად, რომელზეც ჟოზეს გუნდის აყვანა სურს.
"ეს არის დიდი კლუბების ცხოვრება. დიდ კლუბებში დიდი ფეხბურთელები გყავს. დიდ კლუბებში კონკურენციაა. დიდ კლუბებში პასუხისმგებლობებია - ყოველთვის კარგად უნდა ითამაშო, ყველა ტურნირს სერიოზულად უნდა მოეკიდო. ამას კი 11 ფეხბურთელით ვერ მოახერხებ. აბსოლუტურად წარმოუდგენელია 11 ფეხბურთელით ამის გაკეთება, ასე რომ, დიდი კლუბების ფეხბურთელებმა იციან, რომ დიდი გუნდი შედგება 20-ზე მეტი მოთამაშისგან, რომელთაგან ყველას სურს თამაში და ყველასთვის მოიძებნება ადგილი.
რისი გაკეთებაც არ შეგვიძლია, ეს არის 12 ფეხბურთელის გამოყვანა ერთდროულად ერთ მატჩში. მაგრამ ყველასთვის არის ადგილი და საჭიროცაა ეს ადგილი. ვფიქრობ, ეს სრულიად საფუძვლიანია და ჩვენ ყოველ ჯერზე მომატება და მომატება გვინდა. ჩვენ დიდი მიზნების მიღწევა გვსურს. არ გავჩერდებით ამის კეთების პროცესში და ფეხბურთელთა ევოლუცია ძალიან მნიშვნელოვანია.
ძალიან ბედნიერი ვარ და სიამაყე უნდა გამოვხატო ლინგარდის, მარსიალისა და მაკტომინეის პროგრესით. მაგრამ ამავდროულად საჭიროა მატიჩისა და ალექსისის მსგავსი ხალხი, რომელთაც გააჩნიათ გამოცდილება და იციან, როგორია იმ პოზიციაში ყოფნა, რომელშიც ჩვენს გვსურს - ტიტულებისთვის ბრძოლა. ჩვენთვის ძალიან მნიშვნელოვანი შენაძენია".