ტრავმირებული ზლატანი ჯერ კიდევ სასურველი სატრანსფერო სამიზნეა.
"მანჩესტერ იუნაიტედი" ზლატან იბრაჰიმოვიჩის შემცვლელის ძიებაშია, ვინაიდან შვედმა, შესაძლოა, კლუბი დატოვოს.
იბრაჰიმოვიჩს მოქმედი კონტრაქტი სეზონის ბოლოს ეწურება, მაგრამ გამორიცხული არ არის, რომ მან მანამდეც გამოძებნოს თავისთვის სხვა კლუბი, რომლის პოტენციური მდებარეობაც აშშ-ში ან ჩინეთშია.
ჩინეთის სუპერ ლიგა და ამერიკის საფეხბურთო ჩემპიონატი მარტში იწყება და კალენდარული წლის ბოლომდე გრძელდება, ამ ორივე ქვეყნის კლუბები კი აქტიურად ინტერესდებიან ზლატანით მისი სპორტული და კომერციული შესაძლებლობების გამო.
მიუხედავად იმისა, რომ "იუნაიტედი" არ აპირებს შვედთან ივნისის ბოლომდე გამოთხოვებას, კლუბი შესანიშნავად აცნობიერებს, რომ შეერთებულ შტატებსა და ჩინეთში ფეხბურთელის ფასი საგრძნობლად ძვირი იქნება.
რაც არ უნდა გადაწყვიტოს იბრაჰიმოვიჩმა სეზონის შუა პერიოდში, "იუნაიტედში" სჯერათ, რომ "ოლდ ტრაფორდზე" იგი მესამე სეზონს აღარ გაატარებს.
გუნდის ძირითად ფორვარდად არჩეული რომელუ ლუკაკუსთვის უკონკურენტობის პერიოდში საეჭვოა, რომ ჟოზე მოურინიომ ზლატანს პირველმოქმედი პირის როლი შესთავაზოს, ამას კი "იუნაიტედის" 10 ნომერი მიჩვეული არ არის.
იბრაჰიმოვიჩი ამჟამად გასული წლის აპრილში მიღებული ტრავმის რეციდივის გამო უქმობს, მაგრამ კლუბში არ შიშობენ, რომ ეს მდგომარეობა მის კარიერას საფრთხეს შეუქმნის და მიაჩნიათ, რომ იგი მოედანს მალე დაუბრუნდება.
თუმცა, გარდაუვალია ის ფაქტი, რომ იბრაჰიმოვიჩის შემცვლელი გუნდს ნამდვილად სჭირდება. შემცვლელის საპოვნელად კი "იუნაიტედი" სხვადასხვა სტრატეგიულ ნაბიჯს დგამს, რომელთაგან ერთ-ერთი 20-25 წლის თავდამსხმელის შეძენაა და ამგვარ კანდიდატად ანდრე ბელოტის მოიაზრებენ.
მეორე სტრატეგიას კი საკუთარ რესურსებზე დაფუძნება და ენტონი მარსიალსა და მარკუს რეშფორდზე დაყრდნობა წარმოადგენს. თუმცა, აქ წინააღმდეგობას წარმოადგენს ის, რომ არც ფრანგი და არც ინგლისელი არ უთანაბრდება ფიზიკური შესაძლებლობებით ბელგიელ ფორვარდს, რომ არაფერი ვთქვათ რეშფორდის არაეფექტურობაზე უკან დახეული დაცვის ხაზის წინააღმდეგ მოთამაშე გუნდის შემთხვევაში. ამ გარემოებათა გამო, "იუნაიტედს" თითქმის არ აქვს არჩევანის საშუალება, თუკი, რა თქმა უნდა, სრულიად სხვა სქემას არ გამოიყენებს სამოქმედოდ.
და თუ მაინც საკუთარ რესურსებს დაეყრდნობა გუნდი, მაშინ აუცილებელი ხდება ვინგერის შეძენა, რომელიც კომფორტულად იგრძნობს თავს ფლანგზე და კარგი ჩაწოდებებით მოამარაგებს ლუკაკუს.
მესამე არჩევანს წარმოადგენს ახალგაზრდა თავდამსხმელის შეძენა, რომელიც ლუკაკუს მემკვიდრე იქნება და არა ალტერნატივა. ამ შემთხვევაში ყველაფერი მოურინიოს სამწვრთნელო მიდგომასა და პროფესიონალიზმზე იქნება დამოკიდებული, რომლის წყალობითაც თავად უნდა შექმნას თავისთვის სასურველი ფეხბურთელი. თუმცა, ეს ვარიანტია ძალზედ საეჭვოა, ვინაიდან გარანტირებული არ არის, რომ პორტუგალიელი "იუნაიტედში" დიდხანს დარჩება.
წყარო:
uk.sports.yahoo