31-12-2017, 17:31
ნანახია: 1944,
კომენტარები: 10
კარაგერი: "გვარდიოლა რომ "იუნაიტედის" მწვრთნელი ყოფილიყო პრემიერ ლიგას მოიგებდა"
ჯეიმი კარაგერი პასუხობს მოურინიოს.
"ლივერპულის" ყოფილი ფეხბურთელი ჯეიმი კარაგერი, გამოეხმაურა ჟოზე მოურინიოს სიტყვებს იმის შესახებ, რომ ტრანსფერებში დახარჯული თანხა "იუნაიტედისთვის" საკმარისი არ აღმოჩნდა.
"მოურინიოს სიტყვებში არის დიდი ცდომილება. პეპი რომ "იუნაიტედის" ამ გუნდს წვრთნიდეს, ჩემი აზრით ის ტიტულს მოიგებდა. დავუბრუნდეთ სეზონის დასაწყისს და შევადაროთ ამ გუნდების ფეხბურთელები ერთმანეთს.
იყო ედერსონი დავიდ დე ხეაზე ძლიერი? იყვნენ "სიტის" ცენტრალური მცველები სტოუნზი და ოტამენდი უკეთესები, ვიდრე ბაიი და ჯონსი? ნუთუ "მანჩესტერის" გულშემატკივრები ამჯობინებდნენ, რომ მათ გუნდში ყოფილიყო ფერნანდინიო და არა მატიჩი?
"მანჩესტერმა" დაამყარა მსოფლიო რეკორდი ტრანსფერში, როცა პოგბა გაიფორმა, შემდეგ ლუკაკუ გახდა პრემიერ ლიგის ყველაზე ძვირადღირებული ფეხბურთელი. რომელ კლუბს ჰქონდა ამხელა ამბიციები ტიტულის მოგებაზე?
"იუნაიტედის" რომელი გულშემატკივარი გაცვლიდა რეშფორდს სტერლინგში ერთი წლის წინ? ან მარსიალის რეპუტაცია "მანჩესტერში" მოსვლის წინ იყო ლეროი სანეს რეპუტაციაზე მეტი?
ლიუკ შოუ მიუხედავად იმისა, რომ მოურინიომდე გაიფორმეს, კლუბს 30 მილიონი ფუნტი დაუჯდა. პეპმა გაბრიელ ჟეზუსი უფრო ნაკლებ თანხად გაიფორმა. მოურინიოს ჩივილი ფულის და ფეხბურთელების ფასის შესახებ უსაფუძვლოა.
იქ, სადაც მოურინიო ხედავს ფეხბურთელის უუნარობას შეასრულოს ესა თუ ის ტაქტიკური მონახაზი, დარწმუნებული ვარ, პეპი იპოვიდა განსხვავებულ მიდგომას გუნდისადმი, რომელიც მოურინიოს აზრით, უბრალოდ უნდა გაძლიერდეს.
ახლაც კი "იუნაიტედს" ჰყავს ძვირადღირებული სუპერვარსკვლავები, რომელთაც კლუბში გადმოსვლის მომენტში უზარმაზარი ბექგრაუნდი ჰქონდათ. მხითარიანი, პოგბა, ლუკაკუ... გახდნენ ისინი უკეთესები მოურინიოს ხელმძღვანელობის ქვეშ? ეს კითხვები უნდა აწუხებდეს გუნდის მწვრთნელს. იქმნება შთაბეჭდილება, რომ მენეჯერს უბრალოდ არ ჰყოფნის მოთმინება და არ აქვს სურვილი გააუმჯობესოს და განავითაროს ის, რაც უკვე აქვს.
"მანჩესტერ სიტი" წინაა იმიტომ, რომ ისინი მუშაობენ ფეხბურთელებთან, ავითარებენ მათ და არ არიან მხოლოდ მზა ვარსკვლავების შესაძლებლობების იმედად. მოურინიო ენდობა ბევრად უფრო გამოცდილ ფეხბურთელებს. ის არის მწვრთნელი, რომელიც იღებს შედეგს უკვე გამზადებული, ძლიერი შემადგენლობით, თუკი ფეხბურთელები ამა თუ იმ მიზეზით არ იძლევიან შედეგს, ვერ ასრულებენ მოთხოვენბს, ის მიდის. მისი მსოფლიო კლასის მწვრთნელის რეპუტაცია დამყარებულია მის შესაძლებლობაზე, იპოვოს გამარჯვების საშუალება.
ახლა მოურინიო, რომ წვრთნიდეს "სიტის", ის არ ითამაშებდა იმ ფეხბურთს, რასაც ახლა ჩვენ ვუყურებთ. მოურინიოს მუშაობის სიმბოლო - კევინ დე ბრუინი, რომელიც "ჩელსის" მწვრთნელობის დროს გაყიდა.
ბევრი არგუმენტი მოვისმინე, რომ კევინი ისევე როგორც სალაჰი, იმ დროს არ იყვნენ შესაბამის დონეზე და "ჩელსი" მათი გაყიდვით არ დასუსტებულა. მაგრამ სხვა მენეჯერები ასე მარტივად გაუშვებდნენ ამხელა ტალანტებს? თუ ისინი ეცდებოდნენ ეპოვათ საშუალება, აღეზარდათ გრძელვადიან პერსპექტივაში? რთულია იმის დაჯერება, რომ გვარდიოლა ვერ დაინახავდა დე ბრუინში მის პოტენციალს, გამხდარიყო სუპერ მოთამაშე.
გვარდიოლა, როცა კლუბში მოვიდა, დაიწყო მუშაობა გრძელვადიან შედეგებზე გათვლით, თუმცა ის არც მიმდინარე სეზონს ივიწყებს. მოურინიოს მხოლოდ იმ წუთის შედეგები აინტერესებს. ფეხბურთელები, რომლებიც შეიძლება დაჭირდეს 2-3 წლის შემდეგ, მას არ სჭირდება, რადგან ის იშვიათად არის ამდენ ხანს კლუბში.
ჟოზე ადრე იმსახურებდა თანაგრძნობას, მაგრამ არა ახლა, როდესაც მუშაობს მსოფლიოს ერთ-ერთ უდიდეს და უმდიდრეს კლუბში, როცა ისინი ევროპაში თითქმის ყველაზე მეტს ხარჯავენ, როცა ერთადერთი საშუალება, რომ არ ჩამორჩე შენს დაუძინებელ მტერს, არის სავარჯიშო მოედანზე მუშაობა და მართვაში ეშმაკობის გამოჩენა.
ზუსტად ეს განასხვავებს სერ ალექს ფერგიუსონს სხვა დანარჩენებისგან. როცა "ჩელსი" და "სიტი" ფინანსური მხრივ "იუნაიტედის" კონკურენტები გახდნენ, ის ახერხებდა არათუ დაეტოვებინა თავისი კლუბი კონკურენტუნარიანად, ის ტიტულებსაც იგებდა.
ამან ჩემზე ძალიან დიდი შთაბეჭდილება მოახდინა. როცა ის გავიდა პენსიაზე, იმ მომენტიდან "იუნაიტედმა" იმაზე მეტი დახარჯა, ვიდრე მთელი მისი მწვრთნელობის პერიოდში.
სწორედ ეს აჩვენებს "სიტის" და "იუნაიტედს" შორის განსხვავებას ამ სეზონში, რომელსაც არანაირი საერთო არ აქვს ფულთან. "- განაცხადა დასასრულს კარაგერმა
წყარო: Sports.ru