ჟოზე მოურინიომ განაცხადა, რომ თავისი ფეხბურთელების ტრავმიანობასთან დაკავშირებით მხოლოდ სიმართლეს ილაპარაკებს და ამის პარალელურად თვალთმაქცობაში დასდო ბრალი არსენ ვენგერსა და ხოსეპ გვარდიოლას.
გასულ შაბათს ლონდონში "არსენალთან" გამართულ შეხვედრაში მოურინიოს სიბრაზე გამოიწვია იმ ფაქტმა, რომ ალექსანდრ ლაკასეტი "მეთოფეთა" სასტარტო შემადგენლობაში გამოჩნდა, რაც განპირობებული იყო არსენ ვენგერის განცხადებით ფრანგი ფორვარდის თაობაზე, რომლის თანახმადაც მას თამაშის შანსი არ ჰქონდა.
ამჯერად იმავე ხერხს მიმართა, ყოველ შემთხვევაში, იმავე განცხადებას აკეთებს პეპ გვარდიოლა, რომლის თქმითაც მცირე დაზიანება მიიღო დავიდ სილვამ და მისი მონაწილეობა მანჩესტერულ დერბიში საეჭვოა.
"ჩვენს მეტოქეებს ეს პრობლემები აღენიშნებათ. მათ დიდი პრობლემა აქვთ, მაგრამ ბოლოს აღმოჩნდება, რომ ყველა მზადაა სათამაშოდ. მათ ფენომენალური ორგანიზაცია აქვთ, ჩვენ კი ცოტა მოკრძალებულები ვართ.
როცა პრობლემა გვაქვს, მართლაც პრობლემაა და როცა ფეხბურთელები დაშავებულნი არიან, მართლაც ტრავმა აქვთ. მე სიმართლეს ვამბობ.
სიმართლე კი მდგომარეობს იმაში, რომ ერიკ ბაიი კვირას ვერ ითამაშებს. ფილ ჯონსს შანსი აქვს. ფელაინისაც აქვს შანსი. იბრაჰიმოვიჩს ძალიან დიდი შანსი აქვს. მატიჩი ტრავმირებულია, მაგრამ მაინც ითამაშებს. სიმართლეს გეუბნებით, ტრავმირებულია და მაინც ითამაშებს. კერიკს შანსი არ აქვს.
მე სიმართლეს ვამბობ, არავითარი გამონაგონი, როგორც ეს ლაკასეტისა და დავიდ სილვას შემთხვევაში იყო", - განაცხადა მოურინიომ.
ინტერვიუები
8 კომენტარი
ინფორმაცია
ჯგუფ სტუმარი-ის წევრებს არ აქვთ კომენტარის დატოვების უფლება.