პრემიერ ლიგის მე-15 ტურის შეხვედრაში, "იუნაიტედმა" სტუმრად "არსენალს" ანგარიშით 1-3 სძლია. შესანიშნავი მატჩი ჩაატარა "წითლების" ესპანელმა მეკარემ დავიდ დე ხეამ, რომელმაც საბოლოო ჯამში 14 სეივი განახორციელა, რის შემდეგაც პრემიერ ლიგის რეკორდი გაიმეორა. კერძოდ აქამდე ამდენივე სეივი მხოლოდ ორ მეკარეს ჰქონდა განხორციელებული აღნიშნულ ჩემპიონატში.

თამაშის დასრულების შემდეგ, "იუნაიტედის" დამრიგებელმა ჟოზე მოურინიომ, დე ხეას მისამართით საქებარი სიტყვები არ დაიშურა და მას მსოფლიოში საუკეთესო მეკარე უწოდა.

ტელარხ BT Sport- მა შეხვედრის საუკეთესო ფეხბურთელად ჯესი ლინგარდი დაასახელა, ხოლო "წითლების" გულშემატკივრების 90%-მა ხმა დევიდ დე ხეას მისცა, რაც ავტომატურად იმას ნიშნავს, რომ მატჩის საუკეთესოდ ესპანელი კიპერი აღიარეს.

"შეხვედრის დასრულების შემდეგ დე ხეას ვუთხარი, რომ მე დღეს ვიხილე მსოფლიოში საუკეთესო მეკარის თამაში. დიდ მატჩებში გჭირდება მეკარე რომელიც თავის საქმეს შესანიშნავად შეასრულებს, რომელიც იქნება ადგილზე, როდესაც გუნდს მისი დახმარება ესაჭიროება. ვფიქრობ, რომ შემიძლია ჩემი ყველა ფეხბურთელის სახელით ხმამაღლა განვაცხადო: ეს იყო ფენომენალური თამაში დავიდის შესრულებით".- განაცხადა დასასრულს მოურინიომ

შეგახსენებთ, რომ დე ხეა ლიდერობს პრემიერ ლიგის ოქროს ხელთათმანის ნომინაციაში, რომელიც სეზონის ბოლოს ჩემპიონატის საუკეთესო მეკარეს გადაეცემა. მას აღნიშნულ ჩემპიონატში, 15 ჩატარებული შეხვედრიდან 9 მშრალად შენახული კარი აქვს.

წყარო: manutd.ru