"პარი სენ-ჟერმენი" მოულოდნელად გამოჩენილი და ამავდროულად დაწინაურებული გუნდია მარუან ფელაინის მსურველთა სიაში, თუმცა ჯერ საკითხავია, მოისურვებს თუ არა ბელგიელი "ოლდ ტრაფორდის" დატოვებას.

ბრიტანული და სხვა ქვეყნის მედია აქტიურად წერს, რომ ფელაინიმ, შესაძლოა, დატოვოს "მანჩესტერ იუნაიტედი", რომლისგან შეთავაზებული ახალი კონტრაქტი არ მიიღო.

ბელგიელის მოქმედი კონტრაქტი, რომლის მიხედვითაც მის ჯიბეს ყოველკვირეულად 120 ათასი ფუნტი ემატება, მომდევნო ზაფხულს იწურება და მარუანის შეძენით ან უფასოდ გადაბირებით უნაი ემერია დაინტერესებული, რომელსაც დაცვითი აზროვნების ნახევარმცველი სჭირდება.

Le10Sport, ფრანგული გაზეთი აცხადებს, რომ პსჟ 30 წლის ფეხბურთელს ოთხწლიან კონტრაქტს შესთავაზებს და დააკმაყოფილებს მის მოთხოვნებს, რაც "იუნაიტედმა" ვერც გასულ და ვერც მიმდინარე წელს მოახერხა და საბოლოოდ მხოლოდ იმას დასჯერდა, რომ გასულ ზაფხულს ფელაინის შენარჩუნება კონტრაქტში არსებული პუნქტის ამოქმედებითა და შეთანხმების ავტომატურად 1 წლით გახანგრძლივებით შეძლო.

ამ ხნის განმავლობაში კი ფელაინი მოურინიოს გუნდის მნიშვნელოვან ფიგურად იქცა და პოლ პოგბას არყოფნის პერიოდში სწორედ ის იკავებდა გუნდის ნახევარდაცვაში ადგილს.

მაგრამ ასეთი მდგომარეობისა და მოურინიოს დიდი სურვილისა, მოლაპარაკებები მაინც ჩიხში შედის და სულ უფრო და უფრო საგულისხმო ხდება, რომ მარუანი გუნდს დატოვებს.

წყარო: dailymail