მადრიდის "ატლეტიკოს" თავდამსხმელი ანტუან გრიზმანი აცხადებს, რომ არ ნანობს გასულ ზაფხულს "მანჩესტერ იუნაიტედის" წინადადებაზე უარის თქმას.
სატრანსფერო აკრძალვის მქონე "ატლეტიკოს" ფრანგმა თავდამსხმელმა არ უღალატა და კლუბთან ახალი კონტრაქტი გააფორმა, მიუხედავად "იუნაიტედის" მხრიდან მიღებული მაცდუნებელი წინადადებისა.
ამ ორი გუნდის ბედი კი სეზონის სტარტზე სხვადასხვაგვარად წარიმართა: "იუნაიტედი" პრემიერ ლიგის ჩემპიონობისთვის იბრძვის, ხოლო "ატლეტიკო" ლიდერ "ბარსელონას" უკვე 10 ქულით ჩამორჩება და ჩემპიონთა ლიგის ჯგუფური ეტაპიდან გასვლას ვერ ახერხებს.
არც გრიზმანის შედეგიანობაა შთამბეჭდავი: მადრიდული კლუბის რიგებში ჩატარებულ 14 მატჩში მან მხოლოდ 3 გოლი გაიტანა. მიუხედავად ამისა, ანტუანი არ ნანობს, რომ გასულ ზაფხულს "ოლდ ტრაფორდზე" გადასვლა არ ისურვა.
"არ ვნანობ, რომ "ატლეტიკოში" დავრჩი. ეს ჩემი არჩევანი იყო და მოხარული ვარ, რომ ასე გადავწყვიტე. დიახ, უკვე შვიდი მატჩია გოლი ვერ გამაქვს, მაგრამ, დამიჯერეთ, გოლები აუცილებლად დამიბრუნდება", - განაცხადა გრიზმანმა.