"მანჩესტერ იუნაიტედის" მთავარმა მწვრთნელმა ჟოზე მოურინიომ ფილ ჯონსისადმი ინგლისის ნაკრების მიდგომა გააკრიტიკა.

მიუხედავად იმისა, რომ ჯონსს ტრავმა აწუხებდა, ეროვნული ნაკრების მთავარმა მწვრთნელმა იგი ამხანაგური მატჩებისთვის გამოიძახა და გერმანიის ნაკრების წინააღმდეგ ათამაშა. სწორედ ამ მატჩის პირველ ტაიმში მიიღო მან ტრავმა, რის შემდეგაც შეცვალეს და კლუბში სამკურნალოდ დაბრუნდა.

მოურინიოს მიაჩნია, რომ გარეთ საუთგეითს ფილის ჯანმრთელობით არ უნდა გაერისკა.

"არა მგონია, პრობლემის მქონე ფეხბურთელისთვის ამხანაგურ მატჩში მონაწილეობა შესაძლებელი იყოს. რა თქმა უნდა, მათ იცოდნენ ფილ ჯონსის ტრავმის შესახებ. ეს პრობლემები ბოლო სამი თვის განმავლობაში უშლის ხელს და თავისი კლუბის რიგებშიც კი ვერ თამაშობს რეგულარულად. კლუბის შემადგენლობაში ისედაც ექსტრემალურ პირობებში ითამაშა, რადგან "ჩელსისთან" მატჩი ჩვენთვის ძალიან მნიშვნელოვანი იყო.

ამის შემდეგ კი ეროვნულ გუნდში მიდის და ტრავმით ბრუნდება, თუმცა ყველამ თავიდანვე იცოდა მისი პრობლემის შესახებ.

ამასთან, ყოველთვის არსებობენ კლუბები, რომელთა ფეხბურთელებიც რაღაც მიზეზის გამო ვერ მიდიან ეროვნულ ნაკრებში. ეს შეიძლება იყოს ფრჩხილი, სურდო, ფეხის თითზე არსებული პატარა პრობლემა. ისინი უარს ამბობენ გამოძახებაზე და თავის კლუბში რჩებიან, არდადეგებს იწყობენ და ისვენებენ.

და არსებობს სხვა კლუბები, რომელთა მწვრთნელებიც პირდაპირები არიან და თავიანთ ფეხბურთელებს ეუბნებიან, რომ ეროვნულ ნაკრებში უნდა წავიდნენ და ზოგჯერ ამის გამო ისჯებიან.

ჩემთვის საინტერესო იქნება იმის ხილვა, ითამაშებენ თუ არა უახლოეს უქმეებზე ის ფეხბურთელები, რომლებიც ნაკრებში არ წავიდნენ. დრინქუოტერი? დელფი? ერთადერთი, ვინც ნამდვილად ვერ ითამაშებს, ფილ ჯონსია", - განაცხადა მოურინიომ.