"მანჩესტერ იუნაიტედის" ლეგენდა, რაიან გიგზი აცხადებს, რომ არ არსებობს ქვეყნად ახალგაზრდა ფეხბურთელი, რომელსაც მარკუს რეშფორდში გაცვლიდა.

ახალგაზრდა თავდამსხმელი "წითელი ეშმაკების" ერთ-ერთი უმნიშვნელოვანესი ფიგურაა მიმდინარე სეზონში და მისი სათამაშო ფორმიდან გამომდინარე ნაკრებში გამოძახებასაც რეგულარულად იღებს. ინგლისის ნაკრებში გუშინ ამხანაგურ შეხვედრაში დაუპირისპირდა ბრაზილიის ნაკრებს, რომლის რიგებშიც ასპარეზობდა პრემიერ ლიგის კიდევ ერთი გამორჩეული ახალგაზრდა ფეხბურთელი გაბრიელ ჟეზუსი.

"მანჩესტერ სიტის" ფორვარდი პეპ გვარდიოლას ერთ-ერთი პირველი შენაძენი იყო, როცა ესპანელმა სპეციალისტმა მანჩესტერული გუნდი ჩაიბარა და ჟეზუსი თავის ღირებულებას გატანილი გოლებით ამტკიცებს.

მიუხედავად იმისა, რომ ბრაზილიელს ერთ-ერთი წამყვანი როლი უკავია "სიტის" შემადგენლობაში და აქტიურად იტანს გოლებს, უელსელი ლეგენდა მას მაინც არ ამჯობინებს რეშფორდს.

"ეს ორი ფეხბურთელი ერთმანეთისგან განსხვავდება: ჟეზუსს ხშირად გააქვს გოლები, სამაგიეროდ მარკუსს მცველების მოტყუება და სხვადასხვა მოძრაობების გაკეთება უყვარს.

რეშფორდთან მხარდამხარ მიმუშავია და ვიცი მისი შესაძლებლობები. მაგრამ ყველაზე მეტად ის მაოცებდა, რა სურვილით გამოდიოდა მოედანზე. სწორედ ეს აქცევს მას "მანჩესტერ იუნაიტედის" მნიშვნელოვან აქტივად.

ჟეზუსს პირადად არ შევხვედრივარ, მაგრამ თავი ნიჭიერ ფეხბურთელად წარმოაჩინა. თუმცა, არჩევანის გაკეთება რომ მომიხდეს, რეშფორდს არაფრის გულისთვის გავცვლიდი სხვა ახალგაზრდა ფეხბურთელში", - განაცხადა გიგზმა.