პრემიერ ლიგის სეზონი თანდათან უფრო ხურდება, ცხრილს კი 11 ჩატარებული ტურის შემდეგ გამოკვეთილი ლიდერი "მანჩესტერ სიტი" ყავს, რომელიც უახლოეს მდევარ "იუნაიტედს" მთელი 8 ქულით უსწრებს.

მიმდინარე ჩამორჩენასა და გუნდში არსებულ სიტუაციაზე, წითელბის ბელგიელმა შემტევმა რომელუ ლუკაკუმ ისაუბრა და აღნიშნა, რომ ყველაფერი წინ არის და ჯერ კიდევ არის შანსები წარმატების მისაღწევად.

მან ასევე კომენტარი შვედ თავდამსხმელ ზლატან იბრაჰიმოვიჩზეც გააკეთა, რომელიც ტრავმის შემდეგ ოპტიმალურ ფორმას უბრუნდება და მალე შეძლებს გუნდში დაბრუნებას, ხოლო რომელუს თქმით ზლატანი მნიშვნელოვანწილად გააძლიერებს შემადგენლობას და დაეხმარება "იუნაიტედს" გადალახოს ის 8 ქულიანი ჩამორჩენა, რომელიც წითელ ეშმაკებს გვარდიოლას გუნდთან აშორებთ.

"ზლატანის გუნდში დაბრუნება ჩემთვის დამატებით მოტივაციას ნიშნავს, ის შესანიშნავი ფეხბურთელია, მას შესწევს ძალა დაგვეხმაროს და ის ჩამორჩენა რაც "სიტისთან" გვაქვს დავძლიოთ და ვიბრძოლოთ წარმატებისთვის, მისი დაბრუნება ნიშნავს კიდევ ერთი დიდებული ფეხბურთელის ყოლას გუნდში.

სეზონის დიდი ნაწილი დარჩენილია, გვმართებს ძალების მობილიზება და სრული მზადყოფნა, დარწმუნებული ვარ შევძლებთ ვითამაშოთ იმაზე უკეთ ვიდრე გასულ ტურებში გამოვიყურებოდით, ტიტულისთვის ბრძოლა გრძელდება არაფერი დასრულებულა"- განაცხადა ბელგიელმა Sky Sports- ის ჟურნალისტებისთვის მიცემულ ინტერვიუში.

შეგახსენებთ, ლუკაკუმ ეროვნულ ნაკრებში ჩატარებულ ბოლო შეხვედრაში 2 გოლის გატანა შეძლო, ამით ის ნაკრების ბომბარდირებს გაუთანაბრდა 30 გატანილი გოლით და შანსი აქვს, ბელგიის ნაკრების საუკეთესო ბომბარდირი გახდეს 24 წლის ასაკში, ასევე გეტყვით, რომ ამ ორი ბურთით მან მისი აქტივი წლევანდელ სეზონში, კლუბსა და ეროვნულ ნაკრებში გატანილი გოლების რიცხვი 16- ამდე გაზარდა რაც მშვენიერი შედეგია.