სერ ალექს ფერგიუსონმა აღიარა, რომ ედვინ ვან დერ სარის შემცვლელად მანუელ ნოიერის შეძენა სურდა და არა დავიდ დე ხეასი, მაგრამ მოხარულია, რომ აზრი შეიცვალა.

2011 წლის თებერვალში ჰოლანდიელმა კიპერმა კარიერის დასრულების შესახებ განაცხადა, ამიტომ "წითლებმა" ახალი მეკარის ძიება დაიწყეს.

მადრიდის "ატლეტიკოს" ახალგაზრდა მეკარე დავიდ დე ხეა მეკარეთა მწვრთნელის, ერიკ სტილის კანდიდატი იყო, ხოლო ფერგიუსონის არჩევანი 25 წლის ნოიერზე ჩერდებოდა. თუმცა, სტილმა დავაში გაიმარჯვა.

"ერიკ სტილი დავიდ დე ხეას დიდხანს აკვირდებოდა, მაგრამ მერე "შალკეში" მოთამაშე ნოიერი გამოჩნდა სცენაზე. და მიმაჩნია, რომ "შალკე" ბედნიერი იქნებოდა, თუკი ნოიერის გამო მივაკითხავდით და მის შეძენას ვეცდებოდით.

ასე რომ, ჩემი პრობლემა იყო ერიკი, რადგანაც ის დარწმუნებული იყო, რომ დე ხეა უნდა შეგვეძინა. ვეუბნები: "მაგრამ, ერიკ, ეს ბიჭი ნოიერი სრულყოფილია; მისი აღნაგობა, რეაქცია დაუჯერებელია", და ის მეუბნება: "დიახ, მაგრამ სამ წელიწადში დე ხეა უკეთესი იქნება".

ვუთხარი: "ეს უკვე არგუმენტია".

ერიკი და მე დე ხეას სანახავად ჩავედით "ვალენსიასთან" მატჩზე და ყველაფერი, რაზეც ის ლაპარაკობდა - მისი უნარები, თვითრწმენა, სისწრაფე - დამარწმუნებელი იყო.

მერე ერიკმა მის მშობლებთან ჩამოაყალიბა ურთიერთობა და ისეთი დარწმუნებული იყო, რომ მივენდე- და მოხარული ვარ, რომ ასე მოვიქეცი, რადგანაც მართალი აღმოჩნდა", - განაცხადა ყოფილმა მწვრთნელმა.