"მანჩესტერ იუნაიტედის" მწვრთნელი ჟოზე მოურინიო აცხადებს, რომ "ბენფიკასთან" მატჩში დანიშნული მეორე პენალტის დარტყმის უფლების დეილი ბლინდისთვის მიცემა მისი გადაწყვეტილება იყო.

ენტონი მარსიალმა შეხვედრაში დანიშნული პირველი 11-მეტრიანი ვერ გამოიყენა, მაგრამ 78-ე წუთზე იგი მოედანზე უკვე აღარ იმყოფებოდა, ვინაიდან მარკუს რეშფორდმა შეცვალა.

ამიტომ ნიშნულთა გუნდის ბომბარდირი, რომელუ ლუკაკუ მივიდა, მაგრამ ჯერ ერერამ, მერე კი ბლინდმა მას დარტყმის საშუალება არ მისცეს.

მწვრთნელმა ამის შესახებ განაცხადა: "მე იმისთვის მიხდიან, რომ გადაწყვეტილება მივიღო - კარგი ან ცუდი - და პირველ ტაიმში ცუდი გადაწყვეტილება მივიღე, რადგან ჩემ მიერ არჩეულმა მოთამაშემ პენალტი ვერ გაიტანა. მეორე ტაიმში მორიგი გადაწყვეტილება მივიღე და დრამას ვერ ვხედავ, რადგან დრამა არც იყო.

ამ მატჩის პენალტისტი მარსიალი იყო, პირველ ტაიმში ნიშნულთან სწორედ ის მივიდა და ვერ გაიტანა. მეორე პენალტის დროს კი მოედანზე არ იყო, რის გამოც მე მივიღე გადაწყვეტილება.

რომელუს იმიტომ სურდა დარტყმა, რომ მის პიროვნებაში პასუხისმგებლობის საკუთარ თავზე აღებაც შედის - ასევეა ერერაც. მაგრამ ჩემი გადაწყვეტილება დაფუძნებული იყო ბოლო რამდენიმე დღის განმავლობაში ვარჯიშზე ბლინდის მიერ ნაჩვენებზე. ფეხბურთელებმა პატივი სცეს ჩემს გადაწყვეტილებას და ეს არის ამბის დასასრული."

ამ გოლით ბლინდი მე-11 ფეხბურთელი გახდა, რომელმაც მიმდინარე სეზონში "წითლების" რიგებში გოლი გაიტანა. ჩემპიონთა ლიგაზე "აიაქსისა" და "იუნაიტედის" შემადგენლობაში ჩატარებულ 24 მატჩში კი მან ერთადერთი გოლი სწორედ სამშაბათს გაიტანა. საერთო ჯამში დეილის "იუნაიტედში" ექვსი გოლი აქვს გატანილი.