"მანჩესტერ იუნაიტედი" სერ ალექს ფერგიუსონის წასვლის შემდეგ პირველად გავიდა ინგლისის ლიგის თასის მეოთხედფინალში ზედიზედ ორ სეზონში.

ტურნირის მფლობელებმა აწ უკვე ქარაბაო ქაფის მეოთხედფინალში "სუონსის" დამარცხების შედეგად გააღწიეს.

"წითლები" ტიტულის შენარჩუნებას ეცდებიან და სანამ უშუალოდ საქმეში ჩაერთვებიან, თავიანთი მომდევნო მეტოქის ვინაობას დღეს გაიგებენ.

ქვემოთ კი გთავაზობთ ინფორმაციას, რაც კენჭისყრის შესახებ უნდა ვიცოდეთ...

ვის შეიძლება დავუპირისპირდეთ?

შვიდი პოტენციური მეტოქიდან ექვსი პრემიერ ლიგაში ასპარეზობს. "მანჩესტერ სიტიმ" და "არსენალმა" სამშაბათს რთული საშინაო მატჩები გამართეს ჩემპიონშიპის გუნდებთან, რომელთგან "ვულვზმა" მხოლოდ პენალტების სერიაში წააგო "ქალაქელების" წინააღმდეგ, ხოლო "ნორვიჩ სიტი" "მეთოფეებთან" დამატებით დროში დამარცხდა. უმწვრთნელოდ დარჩენილმა "ლესტერ სიტიმ" "ლიდს იუნაიტედი" დაამარცხა 3-1 და ამავე ანგარიშით სძლია "ბორნმუთმა" "მიდლსბროს". "ბრისტოლ სიტი" ჩემპიონშიპის ერთადერთი წარმომადგენელია, რომელიც მეოთხედფინალში იასპარეზებს მას შემდეგ, რაც "კრისტალ პალასს" 4-1 სძლია. თუმცა, ეს როდია სრული ჩამონათვალი გუნდებისა, რომლებიც "იუნაიტედს" შეიძლება შეხვდნენ. დედაქალაქის ორი გუნდი, "ვესთ ჰემი" და "ჩელსი" ასევე არიან პოტენციური მეტოქეები "ტოტენჰემისა" და "ევერტონის" დამარცხების შედეგად, შესაბამისად.

როდის არის კენჭისყრა?

უპრეცენდენტო შემთხვევა მოხდება, როცა კენჭისყრა სტარტს აიღებს - პროცესს ტვიტერზე პირდაპირ ეთერში გადასცემენ 26 ოქტომბერს თბილისის დროით 19 საათზე.

როდის ვითამაშებთ?

მეოთხედფინალური მატჩები 18 დეკემბერს, ორშაბათს აიღებს სტარტს, მაგრამ "წითლები" სავარაუდოდ 20 დეკემბერს ითამაშებენ, ვინაიდან "ვესტ ბრომვიჩთან" მატჩი 17 დეკემბერსაა დანიშნული. "იუნაიტედის" შეხვედრა სწორედ "ვესტ ბრომსა" და "ლესტერ სიტისთან" გასამართ მატჩებს შორის შედგება.