Record-მა შაბათს დიდი ამბები გაავრცელა და გასული კვირა "ევერტონისა" და ვილიამ კარვალიოს დაკავშირებაში, შემდეგ კი ამ ამბის უარყოფაში დახარჯა, თითქოს არასდროს დაუწერიათ ეს ამბავი პირველ გვერდზე და უბრალო შეცდომა იყო.

ამჯერად კი უარყოფა უფრო რთული იქნება, ვინაიდან პორტუგალიური მედიის ადრესატი "მანჩესტერ იუნაიტედი" გახდა. გამოცემა აცხადებს, რომ ჟოზე მოურინიოს კლუბს ალეხანდრო გრიმალდო სურს.

Record-ი დაბეჯითებით ვერ ამბობს, რომ "იუნაიტედი" მაინცდამაინც გრიმალდოს აკვირდება, ვინაიდან ინგლისურ გრანდს "ბენფიკას" თითქმის ყველა მატჩზე ჰყავს წარმომადგენელი გაგზავნილი.

მაგრამ ფაქტია, რომ ადგილობრივი მედია აქტიურად აშუქებს გრიმალდოს პროგრესსა და მარცხენა მცველობის უნარს. ამან კი იმდენად მოხიბლა მოურინიო, რომ 22 წლის მცველის კანდიდატურა მოიწონა და შესაბამის პირებს მასზე მეთვალყურეობა დაავალა.

ლუკ შოუს გამუდმებული ტრავმისა და არადამაკმაყოფილებელი ასპარეზობის ფონზე "იუნაიტედის" მწვრთნელი გრიმალდოს შეძენას კარგ გადაწყვეტილებად მოიაზრებს, მითუმეტეს, რომ მას ჯერ კიდევ "ბარსელონაში" ყოფნის დროიდან აქებენ, სადაც პროგრესირებაში ტრავმამ შეუშალა ხელი.

გასულ სეზონში ალეხანდრომ 14 მატჩი ჩაატარა პორტუგალიის ჩემპიონატში, რასაც მიმდინარე სეზონში 3 მატჩი დაუმატა ამავე ტურნირზე და სამიც ჩემპიონთა ლიგაზე.

მედიის ცნობით, გრიმალდოს ფასი 40 მლნ. ევრო იქნება.