"არსენალის" ნახევარმცველმა, მესუთ ოზილმა, თავისი გუნდის გულშემატკივრებს ჭორების იგნორირება ურჩია და სიმშვიდის შენარჩუნებისკენ მოუწოდა.

მიმდინარე კვირას პრესაში ვრცელდებოდა ინფორმაცია, რომ ოზილმა მყარად გადაწყვიტა "მანჩესტერ იუნაიტედში" გადასვლა თუ არა იანვარში, სეზონის დასასრულს აუცილებლად.

ასევე ამტკიცებდნენ, რომ მესუთი თანაგუნდელებსაც ესაუბრა ამის შესახებ, ხოლო "მეთოფეების" მთავარმა მწვრთნელმა არსენ ვენგერმა გაკეთებულ კომენტარში აღნიშნა, რომ გამორიცხული არ არის გერმანელის გაყიდვა ზამთრის სატრანსფერო ფანჯარაზე, თუკი მასთან ახალი კონტრაქტის თაობაზე შეთანხმებას ვერ მიაღწევენ.

თუმცა, დღეს "ევერტონთან" გასამართი შეხვედრის წინ ოზილმა გულშემატკივრებს მიმართა და შეატყობინა, რომ მისი მომავალი ასე ცალსახა არ იქნება.

"ყურადღებას ნუ მიაქცევთ ხმაურს და შეინარჩუნეთ სიმშვიდე", - დაწერა ოზილმა თავის ტვიტერზე.