ჟოზე მოურინიომ დაადასტურა, რომ მარკუს რეშფორდი "მანჩესტერ იუნაიტედისა" და "ჰადერსფილდის" მატჩისთვის მზად არის.
რეშფორდმა ჩემპიონთა ლიგის ეგიდით "ბენფიკას" წინააღმდეგ პორტუგალიაში გამართული შეხვედრის ერთადერთი გოლი გაიტანა, რის შემდეგაც 76-ე წუთზე ენტონი მარსიალს დაუთმო მოედანზე ადგილი, რისი მიზეზიც მწვრთნელის თქმით შესაძლო მუხლის პრობლემა გახლდათ.
საბედნიეროდ, მწვრთნელმა პარასკევს გამართულ პრესკონფერენციაზე ახსნა, რომ რეშფორდი კარგადაა და მატჩისთვის სრულ მზადყოფნაშია.
"არავინ გვიბრუნდება. იმავე რაოდენობის ფეხბურთელები გვყავს, რაც "ბენფიკასთან" გვყავდა."
მოურინიოს სიტყვები ნიშნავს, რომ ფილ ჯონსიც შეძლებს თამაშს, ვინაიდან "ბენფიკასთან" შეხვედრაში ის სათადარიგოთა სკამზე იმყოფებოდა და მისი და ერიკ ბაიის არყოფნაში დაცვის ცენტრალური ხაზი კრის სმოლინგმა და ვიქტორ ლინდელეფმა დაიკავეს.
ჟოზეს ასევე ჰკითხეს პოლ პოგბას შესახებ, რაზეც უპასუხა: "პოლი არ არის აქ, არ ვიცი, როდის დაბრუნდება. არც ის ვიცი, როდის იქნება ხელმისაწვდომი. ამის შესახებ წარმოდგენაც კი არა მაქვს."