ჟოზე მოურინიო სულაც არ ითვლის დღეებს პოლ პოგბას დაბრუნებამდე და ფრანგის არყოფნაში ნდობას სხვა ფეხბურთელებს გამოუცხადებს.

საფრანგეთის ნაკრების ფეხბურთელმა ჩემპიონთა ლიგის მიმდინარე სეზონის ჯგუფური ეტაპის პირველ ტურში მიიღო ბარძაყის ტრავმა და მწვრთნელისთვის უცნობია, თუ როდის შეძლებს იგი მოედანზე დაბრუნებას, მაგრამ ამაზე არ ღელავს, რადგან სხვა ფეხბურთელების დიდი არჩევანი აქვს.

ასეთ არჩევანს კი მაიკლ კერიკი, ანდერ ერერა, მარუან ფელაინი და ახალგაზრდა ფეხბურთელი სკოტ მაკტომინეი წარმოადგენენ, რომლებიც შემადგენლობის უცვლელ წევრ ნემანია მატიჩს შეუწყვილდებიან.

"საუთჰემპტონთან" მატჩის წინ გამართულ პრესკონფერენციაზე მოურინიომ განაცხადა: "წარმოდგენაც კი არა მაქვს, როდის დაბრუნდება, მაგრამ ეს მორიგი კარგი საშუალებაა სხვებისთვისთვის, რომ ითამაშონ და მე თითოეულ მათგანს ვენდობი. ამიტომაც არ ვაპირებ ტირილს ან დღეების დათვლას, თუ როდის დაბრუნდება პოგბა. როცა დაბრუნდება, სიამოვნებით მივიღებთ, მაგრამ მანამდე ჩემს ბიჭებს ვენდობი."