„მანჩესტერ იუნაიტედის“ კაპიტანმა ნემანია ვიდიჩმა „საუთჰემპტონთან“ მატჩი შეაფასა და განაცხადა, რომ მიუხედავად კარგი პოზიციისა, „იუნაიტედს“ წარმატებულ ფინიშამდე ჯერ კიდევ გრძელი გზა აქვს გასავლელი. დარჩენილ გზაში შედის გასვლითი მატჩებიც, რომლებზეც ის და მისი ფეხბურთელები განსაკუთრებული აქცენტების გაკეთებას აპირებენ.
„შეხვედრის მოსაგებად მატჩის დასასრულისას დიდი ბრძოლა მოგვიწია. ჩვენ ბურთს თითქმის არ ვფლობდით, ისინი კი გამუდმებით გვიტევდნენ.
ხანდახან ასეთი ტიპის მატჩში გამარჯვება მნიშვნელოვანია. მეორე ტაიმით კმაყოფილები ნამდვილად არ ვართ, მაგრამ სამაგიეროდ პირველი ტაიმი განსხვავებული იყო, სადაც ჩვენ რამოდენიმე კარგი საგოლე შანსი გვქონდა. საბოლოოდ, შედეგით კმაყოფილები ვართ. დანარჩენ ინგლისურ გრანდებს თუ გადახედავთ, ნახავთ, რომ მატჩები ყველამ ფრედ დაასრულა, ჩვენ კი მოვიგეთ და პოზიციაც გავიუმჯობესეთ.
ახლა აუცილებელია „ფულჰემთან“ მატჩისთვის კონცენტრირება. გასვლითი შეხვედრები ყოველთვის რთულია, ამიტომ ამაზე აუცილებლად უნდა გავამახვილოთ ყურადღება. ახლა კარგ პოზიციაზე ვიმყოფებით, მატჩების მოგება მნიშვნელოვანია, განსაკუთრებით სეზონის ამ ეტაპზე. ჩვენ უკვე ვიცით, რომ უნდა დავივიწყოთ ცუდი შედეგით დასრულებული შეხვედრები და ვკონცენტრირდეთ მომავალი მატჩებისთვის. ჯერ არაფერი დასრულებულა, მართალია კარგ პოზიციაზე ვართ, მაგრამ წარმატებულ ფინიშამდე გრძელი გზა გვაქვს გასავლელი.“ - განაცხადა ვიდიჩმა MUTV-სთან ინტერვიუში.
ვიდიჩმა გუნდელები, უეინ რუნი და დევიდ დე ხეა შეაქო „საუთჰემპტონთან“ გაწეული დახმარებისთვის და მათ მნიშვნელობაზეც ისაუბრა. სერბის თქმით, რუნი სეზონის მეორე ნახევარში „იუნაიტედისთვის“ განსაკუთრებულად მნიშვნელოვანი იქნება.
“უეინი გუნდისთვის მნიშვნელოვანი ფიგურაა. ის ბევრს მუშაობს და შედეგსაც იღებს. აშკარაა, რომ რუნი რაც უფრო მეტს თამაშობს, უკეთეს ფორმაში შედის. განსაკუთრებით სეზონის მეორე ნახევარში, ის ჩვენ ძალიან გვჭირდება, ისევე როგორც გუნდის დანარჩენი ფეხბურთელები და მათი სასურველ ფორმაში ყოფნა. ახლა საკმაოდ კარგი შემადგენლობა გვყავს, მწვრთნელს ნამდვილად უჭირს ძირითადი 11 ფეხბურთელის არჩევა.
“დევიდმა შესანიშნავი სეივი გააკეთა (გულისხმობს რიკი ლამბერტის ჯარიმას). ვიფიქრე, რომ ბურთი უკვე ბადეში ეხვეოდა, მაგრამ მან საუცხოო სეივით გადაგვარჩინა. დე ხეამ თავისი ნიჭი კიდევ ერთხელ წარმოაჩინა. ის ნამდვილად კარგი მეკარეა და ვფიქრობ, რომ რაც უფრო მეტს ითამაშებს, ბევრად უკეთესი კიპერი გახდება.“ - დაასრულა ნემანიამ.

წყარო: manutd.com