ჟოზე მოურინიო დაზუსტებით ვერ ამბობს, შეძლებს თუ არა მარუან ფელაინი "ბაზელის" წინააღმდეგ მატჩში მონაწილეობას.

ბელგიელმა ფეხბურთელმა სანაკრებო მატჩში მიიღო დაზიანება მწვრთნელი აღნიშნავს, რომ მისი დანაკლისით თავს "სუსტად" გრძნობს.

უეფა-ს ჩემპიონთა ლიგის ეგიდით გასამართი მატჩის წინ მოურინიომ პრესკონფერენციაზე განაცხადა: "გუშინ არ უვარჯიშია, ამიტომ დღევანდელ ვარჯიშს უნდა დაველოდოთ. ის ძალიან მნიშვნელოვანი ფეხბურთელია ჩემთვის, გაცილებით მნიშვნელოვანი, ვიდრე თქვენ გგონიათ. ჩემს გუნდში ფელაინის არყოფნით თავს სუსტად ვგრძნობ და თანაც სულერთია, ის მოედანზე იქნება თუ სათადარიგოთა სკამზე. ამიტომ მისი მდგომარეობის გაუმჯობესების შემთხვევაში აუცილებლად შევა განაცხადში, რადგან ის მჭირდება, მაგრამ ახლა ვერაფერს ვიტყვი."

როცა ჰკითხეს, ფელაინის ძველმა ტრავმამ ხომ არ შეახსენა თავი, მწვრთნელმა უპასუხა: "დიახ, მას ეროვნულ ნაკრებში პრობლემა ჰქონდა და შემდეგ საბერძნეთის ნაკრების წინააღმდეგ ითამაშა, ამის შემდეგ კი უფრო მეტად იგრძნო პრობლემა."