ჟოზე მოურინიო უარს აცხადებს ზლატან იბრაჰიმოვიჩის მოედანზე დაბრუნების ზუსტი თარიღის დასახელებაზე, მაგრამ იმედს გამოთქვამს, რომ შვედი შობის შემდეგ თამაშს შეძლებს.

იბრაჰიმოვიჩმა ხუთშაბათს ერთწლიანი კონტრაქტი გააფორმა "იუნაიტედთან" მას შემდეგ, რაც 2016/17 წლების სეზონში უმძიმესი ტრავმა მიიღო და გამოჯანმრთელების პირას არის.

სწორედ ეს თემა იყო განხილვის საგანი დღეს გამართულ წინასამატჩო პრესკონფერენციაზე, რომელზეც მწვრთნელმა დაადასტურა, რომ შვედი ჩემპიონთა ლიგის განაცხადში იქნება.

"ჩემპიონთა ლიგის ჯგუფური ეტაპისთვის მზად არ იქნება, არა მგონია, ამის შანსი არსებობდეს.

გვაქვს თუ არა ჩემპიონთა ლიგის განაცხადში მისი ადგილი? დიახ, გვაქვს, ასე რომ, არ დაგვჭირდება ვინმეს დატოვება ჩემპიონთა ლიგის სიის მიღმა. მაგრამ ზლატანთან ერთად ჯგუფურ ეტაპზე თამაშს არ ვგეგმავ. იმედი მაქვს, პლეი-ოფის რაუნდში იქნება, მაგრამ ამისთვის საუკეთესო ორ გუნდს შორის უნდა მოვხვდეთ."

როცა ჰკითხეს, ზლატანი რეალურად როდის დაბრუნდება, მოურინიომ უპასუხა: "ამაზე ფიქრი არ მინდა. არც კი მიკითხავს, ამაზე მასთან არ მილაპარაკია, სამედიცინო ჯგუფს ამაზე არ ველაპარაკები. მე მხოლოდ ვფიქრობ, რომ სეზონის მეორე ნაწილში ჩვენთვის დამატებითი ფეხბურთელი იქნება.

როცა ვამბობ სეზონის მეორე ნაწილს, ჩვეულებრივ იანვარს ვგულისხმობთ, შობის შემდეგ პერიოდს, როცა სატრანსფერო ფანჯარა ხელახლა იხსნება. მაგრამ წარმოდგენა არა მაქვს და ვფიქრობ, უფრო სწორი იქნება, თუკი ამაზე საერთოდ არ ვიფიქრებ და მას თავისი საქმის კეთებას ვაცდი ეტაპობრივად და უკან მაშინ დავაბრუნებ, როცა მართლაც მზად იქნება."

მოურინიო მოხარულია, რომ იბრაჰიმოვიჩის სამსახურით სარგებლობის საშუალება ისევ მიეცემა და 35 წლის ფეხბურთელის მონდომება და შრომისუნარიანობა შეაქო.

"ნამდვილად ბედნიერი ვარ, რომ ჩვენთან არის, ვინაიდან ეს მიჩვენებს ფეხბურთელისა და კლუბის ერთგულებას. ფეხბურთელის ერთგულებას იმიტომ, რომ ძალიან ადვილად შეეძლო დაგვმშვიდობებოდა და ეს რომ ეთქვა, საკმარისი იყო ერთი ევროპული ტურნირი, "მანჩესტერ იუნაიტედში" წარმატება, მძიმე ტრავმა, ნახვამდის. მაგრამ მან ეს არ გააკეთა.

მას თავისი ოცნებების ახდენა და უმაღლესი დონის ფეხბურთის თამაში სურს, ასე რომ, ეს მოთამაშის პიროვნულობისა და ხასიათის ერთგულებას აჩვენებს.

ეს აჩვენებს კლუბის ერთგულებასაც - "მანჩესტერ იუნაიტედის" მსგავსმა კლუბმა, ჩემი აზრით, უნდა აჩვენოს, თუ რამდენად დიდ ყურადღებას აქცევს დეტალებს და ეს დიდი, დიდი დეტალია. ფეხბურთელს, რომელიც "მანჩესტერ იუნაიტედის" მაისურით იღებს ტრავმას და "მანჩესტერ იუნაიტედისთვის" იბრძვის, კლუბი მხარში უნდა დაუდგეს და ძალიან ბედნიერი ვარ კლუბითა და ფეხბურთელით."

წყარო: manutd.com