ESPN იუწყება, რომ "მანჩესტერ იუნაიტედი" მიმდინარე სატრანსფერო ფანჯარაზე ფეხბურთელს აღარ შეიძენს.
კლუბმა 160 მილიონი ფუნტი დახარჯა ვიქტორ ლინდელოფის, რომელუ ლუკაკუსა და ნემანია მატიჩის შეძენაზე. გამოცემის თანახმად კლუბს ფეხბურთელის გაყიდვა დასჭირდება, რომ კიდევ ერთი შენაძენი განახორციელოს. მოურინიო მზადაა იანვრამდე დაიცადოს. პორტუგალიელი მაშინ გადაწყვეტს სჭირდება თუ არა გუნდს გაძლიერება.
წლის ბოლოს უკვე თამაში შეეძლებათ შოუს, როხოს, ეშლი იანგს და სავარაუდოდ ზლატან იბრაჰიმოვიჩს, რადგანაც ის "იუნაიტედში" დაბრუნებასთან ახლოსაა.
"იუნაიტედი" ივან პერიშიჩის და გარეტ ბეილის შეძენით იყო დაინტერესებული, მაგრამ დიდი ალბათობით ორივე ფეხბურთელი ახალ სეზონს კვლავ თავიანთ გუნდებში შეხვდებიან. ზამთრის სატრანსფერო ფანჯარაზე "იუნაიტედის" მთავარი სამიზნე ანტუან გრიზმანი იქნება.