მოგესალმებით მეგობრებო !

მანამ სანამ ახალი სეზონი დაიწყებოდეს, გადავწყვიტე შემოგთავაზოთ ახალი რუბრიკა, სადაც ფეხბურთელებს და მათ მიერ ჩატარებულ სეზონს შევაჯამებ. პირველი "სტუმარი" კი უეინ რუნი იქნება. ის ახლა გუნდის საუკეთესო ბომბარდირია და მოდი ერთად მიმოვიხილოთ რუნის მიერ ჩატარებული 2016/17 წლების სეზონი.

მაისში ჟოზე მოურინიო "იუნაიტედის" მთავარ მწვრთნელად დაინიშნა. ბევრ ფეხბურთელს ალბათ ეგონა რომ ჟოზეს მოსვლით მისი მანჩესტერული კარიერა დასრულდებოდა, მაგრამ ძნელად სავარაუდოა რომ მათ რიგებში რუნი ყოფილიყო. კარგად ვიცით რომ ჟოზეს რუნისთან მუშაობის სურვილი არაერთხელ გამოუთქვამს.

"თუ გუნდის დატოვება აქვს გადაწყვეტილი შეუძლია დამირეკოს. ეს ხუმრობით. ვფიქრობ რუნიმ გუნდი არ უნდა დატოვოს, ის "იუნაიტედს" ეკუთვნის" - ეს სიტყვები მოურინიომ 2010 წელს წარმოსთქვა, მაშინ როცა რუნი ახლოს იყო "იუნაიტედის" დატოვებასთან. გამომდინარე აქედან გადაწყვეტილი იყო რომ რუნი ახალ სეზონშიც "იუნაიტედის" მაისურით იასპარეზებდა.

სეზონი რუნისთვის ჩვეულებრივად დაიწყო. ინგლისელმა გუნდს "უემბლიზე" კომუნიტი შილდის მატჩში უკაპიტნა. პრემიერ ლიგისი პირველივე ტურში მან გოლის გატანაც მოახერხა "ბორნმუთის" წინააღმდეგ. "საუთჰემპტონთან" მატჩში რუნიმ იბრაჰიმოვიჩს გაუკეთა საგოლე გადაცემა. "ჰალთან" მატჩში კი რუნის კარგმა თამაშმა და ასისტმა რაშფორდზე "იუნაიტედს" სამი ქულა მოუტანა.

ინგლისელისთვის და ზოგადად "იუნაიტედისთვის" აგვისტო წარმატებული თვე გამოდგა, მაგრამ შემდეგ დაიწყო სექტემბერი... სექტემბერში პირველი მატჩი გუნდს "ოლდ ტრაფორდზე" "სიტის" წინააღმდეგ ჰქონდა სადაც დამარცხდა. რუნი იმ წაგებულ მატჩში ნამდვილად იყო გამოსარჩევი, მაგრამ წაგებულმა დერბიმ ზოგადად გუნდის ფორმაზე ცუდად იმოქმედა და ამას მოჰყვა ზედიზედ 3 მატჩიანი წაგებათა სერია. ამის შემდეგ რუნი ძირითადი შემადგენლობიდან ამოვარდა. პირველივე მატჩში მის გარეშე "იუნაიტედმა" "ოლდ ტრაფორდზე" 4-1 დაამარცხა "ლესტერი".

უეინ რუნიმ სკამზე გადაინაცვლა. მას შემდეგ ინგლისელს ჰქონდა "გამონათებები", ორი საგოლე გადაცემა "სუონსისთან", გოლი და საგოლე გადაცემა "ფეიენოორდთან" და სხვა. ერთი სიტყვით ნათელი გახდა, რომ მოურინიო რუნის მთავარ დამრტყმელ ძალად აღარ თვლიდა და ვეღარ ხედავდა მას სასტარტო თერთმეტეულში.

საბოლოო ჯამში ინგლისელმა სეზონი შემდეგი მაჩვენებლებით დაასრულა:

მატჩი: 39
გოლი: 8
საგოლე გადაცემა: 10

სათამაშო პოზიცია

ინგლისელმა რამდენიმე პოზიციაზე მოახერხა თამაში. ყველაზე მეტი მატჩი მან "ათიანის" პოზიციაზე ჩაატარა, საიდანაც 3 გოლი გაიტანა და 6 საგოლე გადაცემა გააკეთა. გთავაზობთ სტატისტიკას სხვადასხვა პოზიციაზე თამაშის დროს:

ცენტრ ფორვარდი: 9 მატჩი, 2 გოლი, 1 საგოლე გადაცემა
შემტევი ნახევარმცველი: 8 მატჩი, 2 გოლი
მარცხენა ვინგერი: 5 მატჩი, 1 გოლი, 3 საგოლე გადაცემა


სეზონის ყველაზე ცუდი მატჩი:

დაუფიქრებლად შემიძლია ვთქვა, რომ ყველაზე ცუდად რუნიმ "უოტფორდთან" სტუმრად ჩატარებულ შეხვედრაში ითამაშა. ამის დასტურად კი ქვემოთ მოყვანილი ვიდეო გამოგადგებათ.



სეზონის ყველაზე კარგი მატჩი:

სეზონის ყველაზე კარგი მატჩი ჩემი აზრით რუნიმ "ფეიენოორდის" წინააღმდეგ ჩაატარა. მოურინიო მას უკვე აღარ აყენებდა პრემიერ ლიგის მატჩებში, მაგრამ ევროპა ლიგის ჯგუფური ეტაპის მატჩებში რუნის ეძლეოდა თავის გამოჩენის საშუალება. "ფეიენოორდთან" რუნიმ მართლაც გამოიჩინა თავი. მან გოლიც გაიტანა და საგოლე გადაცემის გაკეთებაც მოახერხა.



დასამახსოვრებელი მომენტი:

2016/17 წლების სეზონი ინგლისელის კარიერაში ერთ-ერთი ყველაზე ცუდი იყო თუ ყველაზე ცუდი არა. მაგრამ ეს სეზონი მისთვის და ზოგადად რუნის გულშემატკივრებისთვის მაინც გამორჩეული გახდა.

2017 წლის 7 იანვარს უეინ რუნი ბობი ჩარლტონს გაუთანაბრდა გატანილ გოლებში. 21 იანვარს კი იყო ეს...



დიახ... უეინ რუნი "მანჩესტერ იუნაიტედის" ისტორიაში საუკეთესო ბომბარდირი გახდა.

კომენტარი სეზონზე

ჩემი და ალბათ გულშემატკივრების უდიდესი ნაწილის აზრით ეს რუნის კარიერაში ყველაზე ცუდი სეზონი იყო. ეს იყო ჩემი გულშემატკივრობის პერიოდში ალბათ პირველი შემთხვევა, როცა "მანჩესტერ იუნაიტედს" რუნი აღარ სჭირდებოდა. არ ვიტყვი იმას, რომ უეინ რუნი "მანჩესტერ იუნაიტედისთვის" უკვე პრობლემაა და ამ ფორმაციაში მისი ადგილი აღარ არის, მაგრამ უნდა შევთანხმდეთ რომ რუნის მანჩესტერული და ზოგადად საფეხბურთო კარიერა დასასრულისკენ მიემართება. ინგლისელი ყოველთვის იყო და იქნება "იუნაიტედის" სახე. ეს არის ფეხბურთელი, რომელმაც შექმნა ეპოქა და დაწერა თავისი ისტორია. უეინ რუნი "მანჩესტერ იუნაიტედის" ლეგენდაა. მაგრამ რა იქნება მისი მომავალი ? ფაქტია, რომ მოურინიომ უმტკივნეულოდ და ყოველგვარი აჟიოტაჟის გარეშე ჩამოაცილა რუნი ძირითადად შემადგენლობას. ისიც ფაქტია, რომ მომავალ სეზონებში რუნი უფრო ნაკლებ პროდუქტიული იქნება. მოახერხებს თუ არა ის ძირითადში დაბრუნებას და ფორმის აღდგენას ეს თავად განსაჯეთ.

სარეიტინგო ქულა
6/10

ავტორი: დავით სირაბიძე