მადრიდის "ატლეტიკოს" თავდამსხმელმა, ანტუან გრიზმანმა განაცხადა, რომ "მანჩესტერ იუნაიტედში" მისი გადასვლის შანსი უფრო მეტია, ვიდრე არ გადასვლის.

უკვე რამდენიმე თვეა აქტიურად ირხევა ხმები იმის შესახებ, რომ "წითელ ეშმაკებს" 26 წლის ფორვარდის შეძენა სურთ და არსებობს მოსაზრება, რომ ანტუანი ელოდება ევროპა ლიგის ფინალის შედეგს, რომელმაც უნდა გაარკვიოს, ითამაშებს თუ არა "მანჩესტერ იუნაიტედი" მომდევნო სეზონში ჩემპიონთა ლიგაზე.

ასეა თუ ისე, თავად გრიზმანმა არ გამორიცხა "ოლდ ტრაფორდზე" თავისი გადასვლა. სატელევიზიო გადაცემა Quotidien-ში მან თავისი ტრანსფერი 10-ბალიანი სისტემით 6 ქულით შეაფასა და დაამატა: "უახლოეს რამდენიმე კვირაში უფრო მეტი მეცოდინება".