"მანჩესტერ იუნაიტედის" მთავარი მწვრთნელი ჟოზე მოურინიო მიიჩნევს, რომ ევროპა ლიგის ფინალში მისი გუნდის მეტოქე "აიაქსი" ტურნირზე საერთოდ არ უნდა ასპარეზობდეს.
ეს ორი გუნდი მომდევნო ოთხშაბათს სტოქჰოლმში UEFA-ს რიგით მეორე ტურნირის ფინალში შეხვდებიან ერთმანეთს.
მაგრამ მოურინიო არ აღიარებს სისტემას, რომელიც ჩემპიონთა ლიგიდან გავარდნილ გუნდებს - როგორც "აიაქსის" შემთხვევაში - ევროპა ლიგაზე თამაშის უფლებას აძლევს.
"ეს ჩემპიონთა ლიგის გუნდია, ჩემპიონთა ლიგიდან გადმოვიდა. ამას არასდროს ვეთანხმებოდი, რადგან ერთმა გუნდმა ერთ სეზონში ორ სხვადასხვა ევროპულ ტურნირზე არ უნდა ითამაშოს.
ჩემი აზრით, თუ გუნდი ჩემპიონთა ლიგაზე გადის და საკვალიფიკაციო ეტაპს ვერ ლახავს, სახლში უნდა წავიდეს.
ევროპა ლიგა არის იმ გუნდებისთვის, რომლებმაც თავიდანვე აქ დაიწყეს, როგორც ჩვენ. ჩვენ მეხუთეზე გავედით და ევროპა ლიგაზე მოვხვდით", -განაცხადა მოურინიომ.
მიუხედავად იმისა, რომ ამ სისტემას არ ეთანხმება, მოურინიო აფასებს "აიაქსის" შესაძლებლობებს და არ უკვირს, რომ ისინი ფინალში გავიდნენ.
"არ გამკვირვებია და ვერ ვხვდები, თქვენ რატომ გიკვირთ, რომ ფინალში გავიდნენ.
მოთამაშეთა ასაკი არ არის მნიშვნელოვანი, მთავარი მათი შესაძლებლობებია. ჩემი აზრით, "აიაქსმა" შესაფერის დროს შესაფერისი ინვესტირება განახორციელა.
"აიაქსს" ძალიან კარგი სასკაუტო და სასწავლო სისტემა აქვს. ეს ნიჭიერი ფეხბურთელები ამ კლუბში შემთხვევით არ ჩნდებიან.
"აიაქსის" მწვრთნელ პიტერ ბოშს კარგად არ ვიცნობ, მაგრამ "აიაქსის" თამაშს რომ ვუყურებ, ვხვდები, რომ ფანტასტიკური სამუშაო გასწია", - დაასრულა მოურინიომ.