"მანჩესტერ იუნაიტედის" მთავარმა მწვრთნელმა, ჟოზე მოურინიო გარანტია მოგვცა, რომ "კრისტალ პალასთან" პრემიერ ლიგის ბოლო ტურის მატჩში რამდენიმე ახალწვეული მიიღებს მონაწილეობას და შემადგენლობას პოლ პოგბაც დაუბრუნდება.
მწვრთნელმა რამდენიმე კონკრეტული სახელიც დაასახელა და თქვა, რომ ჟოეულ კაშტრუ პერეირა პრემიერ ლიგაში თავის სადებიუტო შეხვედრას სემ ელერდაისის "არწივების" წინააღმდეგ ჩაატარებს. დემი მიტჩელი, მეთი უილოკი, ჯოშ ჰაროპი და ზეკ დირნლი ასევე მზად არიან უმაღლეს დონეზე პირველად სათამაშოდ, რამეთუ ისინი არასდროს გაუნათხოვრებია კლუბს.
"კვირა დიდი დღე იქნება რამდენიმე ბავშვისთვის, რადგან უმეტესობა მათგანი ითამაშებს. იმედი მაქვს, გულშემატკივარი ამით ისიამოვნებს მიუხედავად იმისა, რომ დიდი, ძლიერი "მანჩესტერ იუნაიტედი" არ იქნება.
იმედი მაქვს, ჟოელს ვათამაშებ. ძალიან კარგი მეკარეა, ასე რომ, საიმედო ხელში ვართ", - განაცხადა მოურინიომ.
როცა ჰკითხეს, როდის ჩაატარებს დავიდ დე ხეა მომდევნო მატჩს, უპასუხა: "ვფიქრობ, "ლოს-ანჯელეს გელექსის" წინააღმდეგ ლოს-ანჯელესში ითამაშებს. დავიდი მსოფლიო კლასის მეკარეა და ჩვენ ნამდვილად გვსურს მისი შენარჩუნება.
ისე არ ვუდგები, "მიდის თუ არა" საკითხი რომ დავაყენო, იმედი მაქვს, რომ დარჩება. ჩვენ ორი უმაღლესი დონის მეკარე და ერთი კარგი ახალგაზრდა მეკარე გვჭირდება, ისინი კი ახლა გვყავს. დავიდი დავიდია და სერხიო სერხიოა. ესპანეთისა და არგენტინის ეროვნული ნაკრებების მეკარეები.
ჩემთვის საოცარია, რომ ისინი გვყავს. სეზონის განმავლობაში ყველაფერი შეხმატკბილებულად მიმდინარეობდა. ყველა ეთანხმებოდა ჩემს გადაწყვეტილებას და ორივე მათგანით ბედნიერი ვარ. ბედნიერი ვარ იმითაც, რომ მომდევნო შეხვედრა პრემიერ ლიგაში ჟოელის სადებიუტო მატჩი იქნება. ამ ბავშვმა თამაში დაიმსახურა."
მოურინიომ თითქმის მთლიანი განაცხადი ჩამოთვალა, რომელიც კვირის ბოლო დღეს "ოლდ ტრაფორდზე" იქნება. "არ გეტყვით", მაგრამ შემდეგ დაამატა: "განაცხადში შევიყვან მიტჩელს, ის სათადარიგოთა სკამზე იყო. მაკტომინეის, ისიც იყო. რა თქმა უნდა, აქსელს. რა თქმა უნდა, ერიკ ბაიი და უილოკიც იქნებიან. ჯოშ ჰაროპიც იქნება. ზაქარი დირნლი იქნება.
პოგბაც იქნება, რადგან პოლს მამის გარდაცვალების შემდეგ არც უვარჯიშია და არც უთამაშია. ორ ან სამ ცვლილებას განვახორციელებ ჩემი ბიჭების დასაცავად, მაგრამ მცირე სტრუქტურა უნდა მივცე ოთხ ან ხუთ ჩემს ბიჭს, რათა ბავშვებმა სტაბილურად იგრძნონ თავი. არა მგონია, რომ ამ მატჩის ჩასატარებლად შესაფერის მდგომარეობაში იყვნენ."