ჟოზე მოურინიოს პირადი მეორე საუკეთესო წაუგებელი სერია კვირას "არსენალთან" მატჩში დასრულდა, როცა მისმა "მანჩესტერ იუნაიტედმა" ოქტომბრის შემდეგ პრემიერ ლიგაში პირველი მარცხი განიცადა.

მატჩის შემდეგ მწვრთნელმა სხვადასხვა საკითხზე ისაუბრა.

თამაშით მოხიბლვა

"იმედგაცრუებული ვარ შედეგით, მაგრამ არა თამაშით, სულაც არა. ძალიან, ძალიან მომეწონა ინდივიდუალური შესრულებები და კოლექტიურიც. წავაგეთ იმიტომ, რომ ვერ გავიტანეთ და მათ მომენტებამდე ჩვენ გვქონდა დიდებული შანსები. მათ კი გაუმართლათ გოლის გატანაში. მხოლოდ ეს არის. ამის გარდა ვერაფერს მოვთხოვ ფეხბურთელებს, რომელთაც ბოლო შვიდ კვირაში ერთი წუთითაც კი არ უთამაშიათ ფეხბურთი. წაგება არ დაგვიმსახურებია. საოცარი რიკოშეტი იყო პირველი გოლის დროს. შორეული დარტყმა გამოვიდა, ახლოდანაც კი არა. მერე კი ბურთმა ძალიან უცნაური ტრაექტორია მიიღო, თუმცა ეს ფეხბურთია. "არსენალი" არ იყო უკეთესი გუნდი, ვიდრე ჩვენ. მათ გაიტანეს, მათ მოიგეს. მე ვულოცავ."

დაბრუნებული ფეხბურთელებით მოხიბლვა

"მე ვფიქრობ, ჯონსმა, სმოლინგმა და მატამ საოცრად ითამაშეს. საოცარი თავდადება და მიდგომა გამოავლინეს შვიდკვირიანი უქმობის შემდეგ. აქსელ ტუანზებეც ასევე იყო. ჩემი აზრით, საოცარი სამუშაოს შეასრულა და ალექსის სანჩესი მის სახელს კარგად დაიმახსოვრებს, რადგან კარგად ეთამაშა. დიდებული სულისკვეთება გამოავლინეს დარმიანმა, მხითარიანმა და ერერამ, რომელთაც ხუთშაბათის მატჩშიც მიიღეს მონაწილეობა. უეინი საოცარი იყო, კერიკი გამოცდილებას გვაძლევდა, მარსიალი თავდადებას და ხარისხიან თამაშს. სხვა ფეხბურთელებიც ყველაფერს ცდილობდნენ. ჩემთვის ძალიან რთული მატჩზე გავლენის მოხდენა, რადგან ბოლოს, როცა ფეხბურთელების შეცვლა მინდოდა, ისინი უნდა შემეყვანა, ვინც ხუთშაბათს ითამაშა. რთული იყო ამის გაკეთება, მაგრამ გუნდი კარგი, ორგანიზებული იყო და მოსაგებად ითამაშა, კარგად იცავდა თავს."

მატჩში მონაწილეთა გამო შიში

"ვშიშობდი, რომ კონკრეტული ფეხბურთელები 90 წუთი ვერ ითამაშებდნენ. მეშინოდა, რომ ჩემი ცვლილებები - ერერასა და მხითარიანის ნაცვლად, რომელთაც ვიგოში სრული მატჩი ჩაატარეს, მატა, ჯონსი ან სმოლინგი უნდა შემეცვალა. მაგრამ ისინი ფანტასტიკურები იყვნენ. ეს მატჩი მათი პლუსია, 90 წუთი თამაში ფანტასტიკურია, რადგან პრემიერ ლიგაში 3 მატჩი გვაქვს ჩასატარებელი და ნახევარფინალიც უნდა ვითამაშოთ, ამის გარდა კი იმედი მაქვს, რომ კიდევ ერთი თამაში გვექნება. ყველა გვჭირდება და ეს 90 წუთი მათთვის ფანტასტიკურია და გუნდისთვისაც კარგია. ამჟამად ისეთი მცირე შემადგენლობა გვყავს, რომ კარგია ამ ბიჭებისგან ასეთი პასუხის გაცემა."