"მანჩესტერ იუნაიტედის" მთავარი მწვრთნელი, ჟოზე მოურინიო მორგან შნეიდერლინისა და ბასტიან შვაინშტაიგერის გაყიდვას შეცდომად არ მოიაზრებს, ვინაიდან ფეხბურთელებისთვის თვითონ არ უთხოვია წასვლა.

"წითლები" მანჩესტერულ დერბიში კიდევ ერთი ტრავმირებული და დისკვალიფიცირებული ფეხბურთელის შემდეგ დაცვასა და ნახევარდაცვის საყრდენ ზონაში საგრძნობ დანაკლისს განიცდიან. გუნდის შემადგენლობაში მყოფ ნახევარმცველებს შორის მხოლოდ ანდერ ერერა და მაიკლ კერიკი არიან ხელმისაწვდომნი.

პოლ პოგბასთან ერთად ტრავმირებულთა სიას ტიმოთი ფოსუ-მენსაც შეემატა, მარუან ფელაინი კი წითელი ბარათის გამო სამ მატჩს გამოტოვებს, რამაც მოურინიოს შესაძლოა, ნახევარდაცვაში უეინ რუნის გამწესება აიძულოს.

შექმნილი ვითარებიდან გამომდინარე "ეტიჰად სტედიუმზე" გამართული მატჩის შემდეგ მოურინიოს ჰკითხეს, მიიჩნევდა თუ არა შეცდომად შნეიდერლინისა და შვაინშტაიგერის გაყიდვას, რაზეც უპასუხა:

"ძალიან რთულია ბევრი ფეხბურთელის ყოლა ისე, რომ ვერ ათამაშო. ჩვენ არ გვითქვამს მორგანისთვის, რომ მისი გაყიდვა გვინდოდა. მორგანმა თავად მთხოვა, გთხოვ, გამყიდე, წასვლა მინდაო. ყველა მატჩში მონაწილეობა მსურსო.

ზოგჯერ ხშირად დგახარ ამ დილემის წინაშე, როცა გსურს დიდი შემადგენლობის შენარჩუნება, მაგრამ ფეხბურთელს დარჩენა არ უნდა. ახალგაზრდა ფეხბურთელებიც კი, რომლებიც არ თამაშობენ, წასვლის ნებას გთხოვენ, რაც ძალიან რთულია.

ჩვენ ექსტრემალურ სიტუაციაში აღმოვჩნდით, სადაც უნიკალური შემთხვევა მოხდა, რომ ერთ მატჩში ორმა ფეხბურთელმა ჯვარედინი მყესები დაიზიანა. ჩემს კარიერაში, 17 წლის განმავლობაში, მხოლოდ ერთხელ მყავდა ასეთი მძიმე ტრავმირებული. ახლა, "ანდერლეხტის" წინააღმდეგ მატჩში, ერთდროულად ორი ფეხბურთელი დაშავდა, ასე რომ, ძალიან უიღბოლები ვართ, მხოლოდ ამის თქმა შეგვიძლია.

სხვა პატარა ტრავმები - პოგბა და ვალენსია გასულ კვირას - გადაღლილობისა და მატჩების სიმრავლის ბრალია, რაც ნორმალურია".

წყარო: manutd.com