ჟოზე მოურინიომ ტრავმებსა და დისკვალიფიკაციასთან გამკლავების პროცესში დეტალური ინფორმაცია გაავრცელა "მანჩესტერ იუნაიტედის" წამყვანი ფეხბურთელების ხელმისაწვდომობასა და რაოდენობაზე.
"წითლების" მწვრთნელი მედიას "მანჩესტერ სიტისთან" მატჩის შემდეგ ესაუბრა და დაადასტურა, რომ ტიმ ფოსუ-მენსა ტრავმირებულთა სიას შეემატა, მარუან ფელაინი კი დერბიში მიღებული წითელი ბარათის შემდეგ სამ მატჩს გამოტოვებს.
უკეთესი ამბავი გაავრცელა ხუან მატას თაობაზე, რომელიც დაბრუნებასთან ახლოსაა, პოლ პოგბა კი, დიდი ალბათობით, ხუთშაბათს "სელტასთან" მატჩში ითამაშებს.
მოურინიოს "სუონსისთან" შეხვედრაში ნახევარმცველის პოზიციაზე უეინ რუნის თამაშიც განიხილა და განაცხადა: "ეს მოსაზრებაა. ჩვენ ერერა, კერიკი და მეტი არავინ გვყავს. ტიმი კიდევ ერთი დანაკლისია, ასე რომ, პრობლემა გვაქვს, მაგრამ ნამდვილად ვიბრძოლებთ.
ვფიქრობ, პირველი, ვინც დაბრუნდება, მატაა, რაც დამატებით არჩევანს მოგვცემს შეტევაში, მაგრამ, რეალურად, ახლა უფრო მეტად ორი ცენტრალური მცველის დაბრუნება გვჭირდება".
მწვრთნელს ასევე ჰკითხეს, კვირას გასამართ შეხვედრაში ერიკ ბაიის დასვენების შესაძლებლობისა და აქსელ ტუანზებესთვის თამაშის შანსის მიცემის შესახებ. იმდენად დიდი დანაკლისი აქვს გუნდს დაცვის ცენტრალურ ხაზში, რომ მწვრთნელმა იხუმრა, მე თვითონაც ვითამაშებო!
"დარბაზში მეც ვვარჯიშობ, ასე რომ, მეც ერთ-ერთი არჩევანი ვიქნები - მოურინიო და ტუანზებე "სუონსის" წინააღმდეგ.
ამჟამად ერიკი ერთადერთი არჩევანია - აქსელი, ერიკი და დეილი. ვფოქრობ, ერიკმა და დეილიმ კვლავ ფანტასტიკურად ითამაშეს. მათ უნდა ვესაუბრო და გავიგო, როგორ არიან და რას გრძნობენ".