ჟოზე მოურინიო აცხადებს, რომ ძალიან კმაყოფილია "ჩელსისთან" ნაჩვენები თამაშით, მაგრამ ფეხბურთელებს მოდუნებისა და ეიფორიაში ყოფნის უფლებას არ მისცემს.

"წითელმა ეშმაკებმა" კვირას პრემიერ ლიგის ლიდერები 2-0 დაამარცხეს და მეტოქეს კარში დარტყმის უფლებაც კი არ მისცეს, რასაც მოურინიო საოცარ თამაშს უწოდებს, მაგრამ ევროპა ლიგის შეხვედრას სერიოზულად უდგება.

"უფლებას არ მივცემ, გონება დაებინდოთ. მინდა, რომ ეს ხალხი მშვიდად იყოს, ხომ იცით; არ მიყვარს, როცა ცუდ მომენტში ჯოჯოხეთია მოწყობილი და კარგ მომენტში სამოთხეს. ამის დრო არ არის. საოცრად კარგად ვითამაშეთ, დიდებული შედეგი და კარგი შეგრძნება იყო ყველასათვის, მაგრამ ახლა მნიშვნელოვანი მატჩი გვაქვს.

შესაძლოა, ლიგის თასის მოგება უფრო დიდი იყო, რადგან ამან ტიტული მოგვცა, მაგრამ ახლა ნახევარფინალში გასვლის საკითხი წყდება, რაც ოცნების შენარჩუნებას ან დასამარებას გაგვიცხადებს. პირველი მატჩის შედეგი ფენომენალური არ იყო, მაგრამ პოზიტიური იყო - კარგ მდგომარეობაში ვიმყოფებით. როგორც კი მსაჯი ჩასტვენს, მოქმედი ანგარიშით მომდევნო ეტაპზე გასულები ვართ და ამის შესანარჩუნებლად 90 წუთი გვაქვს.

თქვენ იცით ჩემი ისტორია და იცით "იუნაიტედისაც" - რაც გაცილებით მნიშვნელოვანია, ვიდრე ჩემი, - საიდან გამომდინარეც ცხადია, რომ სულ ჩემპიონთა ლიგაზე ვთამაშობდით. ამიტომაც არ მოუგია "იუნაიტედს" ევროპა ლიგა და ამიტომაცაა, რომ მე ის ერთადერთხელ მოვიგე შორეულ წარსულში, 2002/03 წლებში.

ჩემპიონთა ლიგაზე ყოფნა გვსურს, მაგრამ სეზონის დასაწყისიდანვე ვამბობ, რომ "იქ არ ვართ". ჩვენ ევროპა ლიგაზე ვართ - ამ ტურნირის მოგება კი შეგვიძლია. უკვე 11 მატჩი ჩავატარეთ, ასე რომ, ვნახოთ, ფინალში გასვლას შევძლებთ თუ არა", - განაცხადა მოურინიომ.