ჟოზე მოურინიომ განაცხადა, რომ უეინ რუნის "მანჩესტერ იუნაიტედისა" და "ანდერლეხტის" მატჩში მონაწილეობის შანსი აქვს, მაგრამ დანარჩენი სამი ფეხბურთელი კვლავ იუქმებს.

კლუბის კაპიტანმა ბოლო ოთხი მატჩი მუხლის ტრავმის გამო გამოტოვა, მაგრამ ხუთშაბათს სათადარიგოთა სკამზე მოხვედრის შანსი აქვს.

"ახლა შრომობს, უმჯობესდება და თუ შუადღის სავარჯიშო სესიაზე დადებითი პასუხი გვექნება, ხვალ განაცხადში შევიყვან.

გამოცდილია, მან კარგად იცის, როგორ გაართვას თავი ამას - ვფიქრობ, ხვალ გამოგვადგება. გოლის გატანა რომ დაგვჭირდეს, დაგვეხმარება. შედეგის შენარჩუნება, ბურთის დაჭერა რომ დაგვჭირდეს ან ბურთის ფლობით მატჩზე კონტროლის მოპოვება, ამაშიც დაგვეხმარება. ასე რომ, იმედი მაქვს, სავარჯიშო სესიაზე დადებითი პასუხი იქნება.

"ჩელსისთან" მატჩში ახალი ტრავმირებული არ დაგვმატებია და არც არავინ გამოჯანმრთელებულა, არც მატა, არც ჯონსი, არც სმოლინგი. ისინი უქმობენ და კიდევ იუქმებენ. უეინი არის ერთადერთი, ვისი თამაშიც შესაძლებელია, თუკი შესაძლებელია.

ახლა ვერაფერს დაგიდასტურებთ, მაგრამ ის პაპარაცები, რომლებიც სასტუმრო "ლოურიში" ცხოვრობენ, ფოტოებს გადაიღებენ, როცა სასტუმროში მივალთ ექვს საათზე და ვნახოთ, უეინი იქნება თუ არა. რა თქმა უნდა, მინდა, რომ იყოს, მისი ყოფნა მსურს."

რაც შეეხება უეინის გამოჯანმრთელებას ბოლო ტრავმის შემდეგ, მოურინიომ განაცხადა: "სეზონის განმავლობაში დიდი პრობლემები არ ჰქონია, მაგრამ მცირე პრობლემები ჰქონდა და როცა კონკრეტულ ასაკში შედიხარ, ოდნავ უფრო რთული ხდება გამოჯანმრთელება.

ვფიქრობ, მხოლოდ ამაშია საქმე, მაგრამ პრემიერ ლიგაში შვიდი მატჩი გვაქვს, პლუს ერთი, სამი ან ოთხი ევროპა ლიგაზე, ასე რომ, 10 ან 11 მატჩი გვექნება. ბევრი ფეხბურთელი არ გვყავს: იანვრის ბაზარზე რამდენიმე მოთამაშე დავკარგეთ, არავინ შეგვიძენია, სანაკრებო პაუზაზეც დავკარგეთ მოთამაშეები. ყველა გვჭირდება, ვინც ითამაშებს და უეინს შეუძლია, ასე რომ, დახმარებას გაგვიწევს."

წყარო: manutd.com