"მანჩესტერ იუნაიტედის" მთავარმა მწვრთნელმა, ჟოზე მოურინიომ დაადასტურა, რომ ევროპა ლიგის ეგიდით "ანდერლეხტთან" გასამართ მატჩს სერხიო რომერო სასტარტო შემადგენლობაში დაიწყებს.

არგენტინელმა მეკარემ "წითლების" 11 მატჩში მიიღო მონაწილეობა მიმდინარე ევროპა ლიგაზე გამონაკლისი არც ბელგიაში გამართული შეხვედრა გახლდათ.

თუმცა, როცა ჰკითხეს რომერო არის თუ არა ევროპა ლიგაზე მისი პირველი არჩევანი, მოურინიომ უპასუხა: "არა, ის არის ჩემი მეკარე ევროპა ლიგაზე. ის ჩემი მეკარე იქნება ხვალ.

ის იყო ჩემი მეკარე სხვა მატჩებშიც, მაგრამ არა ევროპა ლიგაზე. არასდროს მყვარებია ადამიანების გარჩევა. ვიტყვი, რომ სერხიოსთვის პრიორიტეტული ევროპა ლიგაზე თამაშია, მაგრამ რამდენიმე ისეთი შეხვედრაც გვქონდა, სადაც დავიდმა ითამაშა.

დავიდის პრიორიტეტი პრემიერ ლიგაში თამაშია, მაგრამ მე არ მიყვარს გამოცალკევება. ვერ ვიტყვი, რომ რომელიმე კონკრეტული მატჩი ერთს ეკუთვნის ან მეორეს. რეალობა ის არის, რომ სერხიო ძალიან სტაბილური და გამოცდილია. კარგად თამაშობს. პრემიერ ლიგის შეხვედრაშიც დაიცვა კარი და კარგად ითამაშა. ინგლისის თასზეც ითამაშა და კარგად იდგა. ლიგის თასზეც ითამაშა და იქაც კარგი იყო.

ყოველთვის, როცა თამაშობს, კარგად გამოიყურება. ძალიან სტაბილურია და მეკარის თამაში მნიშვნელოვანია, რადგან თუ არ ათამაშებ, ერთი დღე პრობლემა შეგექმნება, როცა დააყენებ იმ მეკარეს, ვისაც მატჩის რიტმის შეგრძნება დაკარგული აქვს. ყოველთვის მიყვარდა მეკარეთა შეცვლა სხვადასხვა ტურნირებზე, მაგრამ ამ სრული გამოცალკევების გარეშე, რასაც "ეს შენი სათამაშებელი მატჩია, ეს შენი", ჰქვია."