"მანჩესტერ იუნაიტედის" მთავარი მწვრთნელი, ჟოზე მოურინიო აღიარებს, რომ მისი გუნდი იდეალურისგან ძალიან შორს არის და კიდევ ერთი სატრანსფერო ფანჯარა სჭირდება, რათა გუნდის სათანადოდ გაძლიერება შეძლოს.
მიუხედავად იმისა, რომ "წითელმა ეშმაკებმა" ზლატან იბრაჰიმოვიჩი, პოლ პოგბა და ჰენრიხ მხითარიანი გადაიბირეს, პრემიერ ლიგაში კი 21-მატჩიანი წაუგებელი სერია აჩვენეს, გუნდი დიდი ხანია გამოეთიშა ჩემპიონობისთვის ბრძოლას და ვერც ოთხეულში ახერხებს შესვლას.
მოურინიოს კი მიაჩნია, რომ ზაფხულის სატრანსფერო ფანჯარა გუნდს მწყობრში მოიყვანს. "ამ კლუბში მხოლოდ ერთი სატრანსფერო ფანჯარა მქონდა, მეორე არ გამოგვიყენებია. კიდევ ერთი მასშტაბური სატრანსფერო კამპანია გვჭირდება", - განაცხადა "იუნაიტედის" მწვრთნელმა.