ჯესი ლინგარდი ვერ ხვდება, რატომ თამაშობს "მანჩესტერ იუნაიტედი" გასვლაზე უკეთ, ვიდრე საშინაო სტადიონზე, მაგრამ გასვლაზე მოპოვებული გამარჯვებათა სერიის გაგრძელება "ანდერლეხტთან" მატჩში სურს.

ლინგარდისთვის კარგი კვირა გამოდგა, რამეთუ მან ახალი კონტრაქტი გააფორმა თავისი ბავშვობის კლუბთან, "სანდერლენდთან" მატჩში შეცვლაზე გასვლის შემდეგ კი მან ერთ-ერთ გულშემატკივარს ხელმოწერილი მაისური გადასცა.

"წითლებს" ამჟამად სამმატჩიანი გამარჯვებათა სერია აქვთ პრემიერ ლიგის გასვლით მატჩებში, რომელთაგან პირველი "ლესტერ სიტისთან", მეორე "მიდლსბროსთან", ხოლო მესამე "სანდერლენდთან" იქნა მოპოვებული.

როცა "შავი კატები" 1-0 მარცხდებოდნენ, შეხვედრის მთავარმა არბიტრმა მოედნიდან სებასტიან ლარსონი გააძევა, თუმცა ლინგარდი არ ფიქრობს, რომ ამან გადამწყვეტი როლი ითამაშა საბოლოო გამარჯვებულის გამოვლენაში.

"რა თქმა უნდა, ისინი 10-კაცით თამაშობდნენ, მაგრამ ჩვენ პროფესიონალური თამაში ვაჩვენეთ. ბევრი შანსი შევქმენით და ნახევარმცველების უკან დიდი სივრცე გვქონდა, განსაკუთრებით კი მე და მიკის.

ამის შემდეგ ვიცოდით, რომ ბურთი უნდა შეგვენარჩუნებინა, რადგანაც ზეწოლის ქვეშ გვამყოფებდნენ 1-0 ანგარიშზე და საბრძოლოდ გამოვიდოდნენ. მაგრამ ვაცნობიერებდით, რომ ბურთის შენარჩუნების შემთხვევაში თამაშიდან გამოვთიშავდით და მეორე გოლსაც გავიტანდით, როგორც ბოლოს აღმოჩნდა, ამას მესამეც მოჰყვა.

გასვლაზე ძალიან კარგად ვთამაშობთ. არ ვიცი, რატომ ხდება ასე, მაგრამ კარგად ვთამაშობთ. დღის ბოლოს მორიგი სამი ქულა ჩაიწერა ჩვენს აქტივში".

ევროპა ლიგის ნახევარფინალში გასვლის ბარიერს "ანდერლეხტი" წარმოადგენს, რის შესახებაც ლინგარდი ფიქრობს, რომ აუცილებელი არ არის გასვლაზე გოლის გატანა, მთავარი ორი მატჩის ჯამში "ოლდ ტრაფორდზე" გამარჯვებაა.

"რა თქმა უნდა, ნებისმიერი თამაშის მოგება გვსურს. ვიცით, რომ დიდი მატჩია, რამეთუ ჩემპიონთა ლიგაზე მოხვედრის კიდევ ერთი საშუალებაა, რაც ძალიან მნიშვნელოვანია ჩვენთვის და კლუბისთვის. იქ ჩასვლა და გამარჯვების მოპოვება გვსურს.

რთული მატჩი იქნება, მაგრამ იმაზეა დამოკიდებული, ვინ იქნება უკეთესი იმ დღეს. თუკი სწორი მენტალიტეტით ჩავალთ, რაშიც დარწმუნებული ვარ, მოვიგებთ".



წყარო: manutd.com