Manchester Evening News-ის ცნობით, ჟოზე მოურინიო ზაგრებშია და ის "ინტერის" ფეხბურთელის, ივან პერისიჩის ტრანსფერზე შეთანხმების მიღწევას ეცდება.

28 წლის ხორვატიელი ვინგერი ნაკრებთან ერთად ვარჯიშობს და პარასკევის მატჩისთვის ემზადება, სადაც მისი გუნდი უკრაინის ნაკრებს დაუპირისპირდება.

მედიის ცნობით, "მანჩესტერ იუნაიტედის" ბოსმა ფეხბურთელის აგენტთან, პრედრაგ მიატოვიჩთან მოაწყო შეხვედრა. "წითლების" მენეჯერი დიდი ხანია ინტერესდება ხორვატი ფეხბურთელით, რომელსაც გარდა ვინგერის პოზიციისა, შემტევ ნახევარმცველადაც შეუძლია თამაში.

მოურინიო ხორვატიის დედაქალაქში აგენტთან შეხვედრისას დააფიქსირეს. პორტუგალიელმა სპეციალისტმა სასტუმროდან გამოსვლის შემდეგ, სეირნობისას, ჟურნალისტებს მადლობა გადაუხადა "ქალაქში სეირნობისას კომპანიონობისთვის". გავრცელებული ინფორმაციით, "იუნაიტედი" პერისიჩის შეძენას 30 მილიონ ფუნტად ეცდება.



წყარო: MEN