დენის ირვინს მიაჩნია, რომ სეზონის ამ ეტაპზე "მანჩესტერ იუნაიტედის" შემადგენლობიდან წამყვანი ფეხბურთელის ამოგდება სარისკო იქნება, მაგრამ როტაცია გუნდს სჭირდება.

"წითელი ეშმაკები" პროდუქტიულ სეზონს ატარებენ ტურნირებზე ასპარეზობის თვალსაზრისით, რაც თავის მხრივ შემადგენლობის სტაბილურობას უწყობს ხელს. ისეთი ასაკოვანი ფეხბურთელიც კი, როგორიც ზლატან იბრაჰიმოვიჩია, თითქმის ყოველთვის სასტარტო შემადგენლობაშია, როცა ხელმისაწვდომია.

მოურინიოს თავდამსხმელის პოზიციაზე არც ისე ბევრი ფეხბურთელი ჰყავს, მაგრამ საჭიროების შემთხვევაში დაზღვევა ნამდვილად შეუძლიათ.

კლუბის ლეგენდას, ირვინს მიაჩნია, რომ "იუნაიტედს" აუცილებლად სჭირდება შემადგენლობაში ცვლილებების შეტანა რამდენიმე ტურნირზე ასპარეზობის ფონზე, რასაც 1999 წელს სერ ალექს ფერგიუსონი მიმართავდა.

"ყველა თამაშში მონაწილეობა გსურს, მაგრამ ეს თითქმის შეუძლებელია, განსაკუთრებით კი თავდამსხმელებისთვის, რომლებიც მუდმივად მწვავე უნდა იყვნენ.

მწვრთნელის გადასაწყვეტია, როდის მოისურვებს გადახალისებას. '99 წელს სერ ალექსი შემადგენლობას ოდნავ ახალისებდა. მახსოვს "არსენალის" წინააღმდეგ ნახევარფინალი, როცა რამდენიმე მოთამაშე დაასვენა. ხანდახან რისკის გაწევა საჭიროა, მაგრამ ეს მწვრთნელის საქმეა.

კარგი შემადგენლობა გვყავს, წინ საერთაშორისო მატჩების გამო შესვენებაცაა. ვნახოთ, რა მოხდება", - განაცხადა ირვინმა.

წყარო: goal.com