ჟოზე მოურინიოს იმედი აქვს, რომ ზაფხულის სატრანსფერო ფანჯარაზე "მანჩესტერ იუნაიტედის" სხვა დონეზე აყვანას შეძლებს და მისი რწმენით, ზლატან იბრაჰიმოვიჩი ამაში ფუნდამენტურ როლს ითამაშებს.

35 წლის შვედმა 26 გოლი გაიტანა მიმდინარე სეზონში და "იუნაიტედი" მასთან კონტრაქტის ერთი წლით გახანგრძლივებას გეგმავს.

"წითლები" უმთავრეს სატრანსფერო სამიზნედ ანტუან გრიზმანს მოიაზრებენ და მის შეძენას იბრაჰიმოვიჩის დარჩენისგან დამოუკიდებლად ეცდებიან.

მოურინიო კი დარწმუნებულია, რომ ზლატანი მომდევნო სეზონშიც ერთ-ერთ მთავარ როლს შეასრულებს გუნდის წარმატებისთვის.

"ზლატანს მომავალში ჩვენთან ვხედავ, რადგან მასთან მიღწეული შეთანხმებით ჩვენთან ერთი წელი უნდა გაეტარებინა და ჩვენ კონტრაქტის გახანგრძლივების საშუალება გვაქვს, ამიტომაც მგონია, რომ დარჩება.

საოცრად წარმატებული წელი ჰქონდა და მნიშვნელობა არ აქვს, რა მოხდება სეზონის ბოლომდე. მის მიერ გატანილი გოლები, მოგებული ტიტული, გუნდზე მოხდენილი გავლენა და ორჯერ უმთავრესი როლის თამაში საკმარისზე მეტია იმისათვის, რომ "მანჩესტერ იუნაიტედში" მის კარიერას წარმატებული უწოდო.

მაგრამ ამ გუნდმა ბევრ რამეში უნდა მოუმატოს. მომდევნო სატრანსფერო ფანჯარა კი გუნდს სხვა დონეზე აიყვანს, რადგანაც რამდენიმე ახალი მოთამაშის მოყვანას ვეცდებით.

ასე რომ, ვფიქრობ, ზლატანი მეორე წელს ფუნდამენტურ როლს ითამაშებს ამ გუნდში და მასაც სურს დარჩენა, თუმცა ეს ჩემი აზრია, მცდარი ან სწორი.

მე მხოლოდ ის ფეხბურთელები მჭირდება, ვისაც 100 პროცენტით სურს დარჩენა, მაგრამ ჩემი შეგრძნებით, ის ამაყობს საკუთარი თავით და ბედნიერია თავის სიტუაციაში მიღწეული წარმატებით, ამიტომაც მგონია, რომ დარჩება", - განაცხადა მოურინიომ.

წყარო: M.E.N.