ზლატან იბრაჰიმოვიჩის გვიანდელმა გოლმა "მანჩესტერ იუნაიტედს" ლიგის თასის ფინალში "უემბლიზე" გამარჯვება მოუპოვა, თუმცა თავდამსხმელი არ აპირებს მიღწეულზე გაჩერებას.
შეხვედრის დასრულებამდე სამი წუთით ადრე შვედის მიერ გატანილმა თავურმა გოლმა "საუთჰემპტონთან" დრამატულ შეხვედრაში საბოლოო ანგარიში, 3-2 დააფიქსირა.
"წითლებმა" მანამდე ქომუნითი შილდი მოიგეს და ჯერ კიდევ ასპარეზობენ სამ სხვადასხვა ტურნირზე, ფინალის საუკეთესო ფეხბურთელი კი უფრო მეტ მიზანს ისახავს წინ.
როცა ჰკითხეს, ყოველთვის გამარჯვებულია თუ არა, ზლატანმა კლუბის ოფიციალურ ტელევიზიას უპასუხა: "ასე ჩანს. სადაც არ უნდა წავიდე, ვიმარჯვებთ და ამის გამო ბედნიერი ვარ. ხანგრძლივი და ფანტასტიკური კარიერა მქონდა. ინგლისში მოსვლამდე შემეძლო უბრალოდ დავმჯდარიყავი და იმით დავკმაყოფილებულიყავი, რასაც მივაღწიე. მაგრამ მე ასეთი არ ვარ, მე კმაყოფილი არასდროს ვარ, უფრო მეტი მინდა, ჯერ კიდევ დამშეული ვარ, ამ ასაკშიც კი.
"იუნაიტედთან" ერთად მოგებული ჩემი მეორე ტიტულია და სუპერ ბედნიერი ვარ. აქ მოსაგებად მოვედი და ვიგებ კიდეც. "საუთჰემპტონმა" ძალიან კარგად ითამაშა, ჩვენ კი ვერ ვთამაშობდით ისე, როგორც ჩვეულებრივ. მაგრამ ეს არ ნიშნავს, რომ მათი ღვაწლი არ უნდა დაფასდეს, მათ ხომ კარგი შეხვედრა ჩაატარეს. 2-0 ჩამორჩენიდან ანგარიში 2-2 გახადეს, რაც ადვილი არ არის. ვულოცავ მათ კარგ თამაშს, მაგრამ თასი ჩვენია.
საოცარი შეგრძნებაა, რადგან მატჩი მოვიგეთ. ადვილი არ იყო, რთული გამოდგა, კარგი მეტოქე გვყავდა, მაგრამ ყველაფერი გამარჯვების საკითხია. მნიშვნელობა არ აქვს, რამდენად კარგი ხარ ან რამდენად ცუდად თამაშობ, თუ იმარჯვებ, იმას აღწევ, რაც გინდოდა და ეს ყველაზე მნიშვნელოვანია".