"მანჩესტერ იუნაიტედის" მთავარმა მწვრთნელმა, ჟოზე მოურინიომ დაადასტურა, რომ ჰენრიხ მხითარიანი ლიგის თასის ფინალში ვერ ითამაშებს, მაიკლ კერიკი კი გუნდს უბრუნდება.
ორივე ფეხბურთელი ოთხშაბათს ევროპა ლიგის ეგიდით "სენტ-ეტიენთან" მატჩში დაშავდა, რის შემდეგაც მოურინიომ განაცხადა, რომ მხითარიანსა და კერიკს ბარძაყისა და მყესის ტრავმა ჰქონდათ შესაბამისად.
უეინ რუნი ვარჯიშებს დაუბრუნდა და "უემბლიზე" გასამართ მატჩში მონაწილეობის მიღებას შეძლებს. ბოლოს, 2010 წელს, როცა "იუნაიტედმა" ეს ტურნირი მოიგო, კაპიტანმა "ასტონ ვილას" კარში გოლის გატანაც მოახერხა.
გადაწყვეტილების მიღება მოუწევთ ფილ ჯონსის მდგომარეობის თაობაზე, რომელიც ასევე ტრავმირებული იყო.
"მაიკლი ხელმისაწვდომია. ჭკვიანი და გამოცდილია. "სენტ-ეტიენთან" მატჩში მოედანი სწორ დროს დატოვა, ასე რომ, მაიკლი ხელმისაწვდომია. მხითარიანი ვერ ითამაშებს და ჯონსს რაც შეეხება, ვნახოთ და ხვალ გადავწყვიტოთ.
უეინი კარგადაა, გუნდთან ერთად ვარჯიშობს. "სენტ-ეტიენთან" იმიტომ არ ვათამაშე, რომ მზად არ იყო, მაგრამ კიდევ ერთი მნიშვნელოვანი სესიის გამართვა შეეძლო, ამიტომ ეჭვი არ არის, მატჩში მონაწილეობას მიიღებს", - განაცხადა მოურინიომ.