"ბლექბერნ როვერსთან" მატჩის მეორე ტაიმში შეცვლის შედეგად შესული ზლატან იბრაჰიმოვიჩი და პოლ პოგბა მოხარულები არიან, რომ "მანჩესტერ იუნაიტედის" გამარჯვებაში მნიშვნელოვანი როლი ითამაშეს.
"წითლებს" ჩემპიონშიპის კლუბის წინააღმდეგ ერთბურთიანი ჩამორჩენის აღმოფხვრა მოუხდათ "ივუდ პარკზე" გამართულ რთულ მატჩში, რომელშიც მასპინძელთა მხრიდან დენი გრემმა გახსნა ანგარიში, რასაც პირველ ტაიმში მარკუს რეშფორდმა გამათანაბრებელი გოლით უპასუხა. 1-1 ანგარიშზე კი მოურინიომ მატჩში პოგბა და იბრაჰიმოვიჩი ჩართო, რომლებმაც 75-ე წუთზე საგოლე გადაცემა და გოლი მიითვალეს შესაბამისად.
ზლატანი თავმდაბლურად გამოეხმაურა მატჩზე მის მიერ მოხდენილ გავლენას, მაგრამ მოხარული იყო, რომ გუნდი მომდევნო რაუნდში გავიდა: "გუნდი ჩვენს შემოსვლამდეც კარგად თამაშობდა, ბევრს შრომობდნენ და ცოტა არ გაუმართლათ გაშვებული გოლის დროს, მაგრამ თავი ხელში აიყვანეს და დონეს მიაღწიეს.
მეორე ტაიმში კი ცოტა უფრო მეტი დონე ვაჩვენეთ და პოლმა კარგი პასი მომცა, მე კი მიხარია, რომ გამოვიყენე და გოლის ავტორი გავხდი. კარგი გუნდური თამაში იყო. ბევრს ვშრომობდით და შედეგს მივაღწიეთ, რაც უფრო მეტ თავდაჯერებულობას გვძენს ყოველ მატჩში წინსვლისათვის."
გამარჯვების გოლი მეექვსე შემთხვევა იყო, რომ პოგბამ იბრაჰიმოვიჩს საგოლე გადაცემა გაუკეთა, რაც ხაზს უსვამს ამ წყვილის კავშირს.
პოგბა: "მე მხოლოდ გუნდის დახმარებას ვცდილობ. მის მოძრაობას და ჩარბენებს ვამჩნევ, დღეს კი ამან გაამართლა. ხანდახან ასევე ამართლებს, მაგრამ ხანდახან არა. საბედნიეროდ, დღეს ასე მოხდა და გამარჯვება მოვიპოვეთ, რაც მახარებს".
"იუნაიტედს" ლანკაშირის შუადღეს წვიმიან ამინდში მოუხდა თამაში და იბრაჰიმოვიჩი შესანიშნავად აცნობიერებს რთულ პირობებში მოპოვებული გამარჯვების მნიშვნელობას.
"ინგლისში ჩამოსვლის დღიდან ყველა მატჩი რთული იყო. ერთი გუნდი ვერ დომინირებს თამაშში. მატჩის მოგება თუ გინდა, ცოტა ნაკლები შეცდომა უნდა დაუშვა.
ყოველი მატჩი განსაკუთრებულია, ინგლისის თასზე ჩატარებული ყოველი მატჩი. იქნება ეს პრემიერ ლიგის გუნდი თუ ჩემპიონშიპის, მნიშვნელობა არ აქვს. როგორც შაბათს დავინახეთ, ყველა ფავორიტი გუნდი როდი გადის მომდევნო რაუნდში და ჩვენც უნდა დავრწმუნდეთ, რომ ჩვენი ფავორიტობის დამტკიცება საქმით შეგვიძლია, რაც დღეს მოვახერხეთ."