"მანჩესტერ იუნაიტედის" მთავარი მწვრთნელი, ჟოზე მოურინიო აცხადებს, რომ არ ფიქრობს ინგლისის თასის მეოთხედფინალში თავისი ყოფილი გუნდის, "ჩელსის" წინააღმდეგ თამაშზე.

"წითლებმა" ინგლისის თასის მე-5 რაუნდში სტუმრად "ბლექბერნ როვერსს" სძლიეს 1-2, რის შემდეგაც ცნობილი გახდა, რომ მოურინიოს შეგირდები მე-6 რაუნდში "სტემფორდ ბრიჯზე" "ჩელსის" დაუპირისპირდებიან.

შეხვედრის თარიღი ჯერ უცნობია და 10-13 მარტის ჩათვლით რომელიმე დღეს გაიმართება, რის გამოც "საუთჰემპტონთან" პრემიერ ლიგის ეგიდით ჩასატარებელი შეხვედრა გადაიდება, მანამდე კი "იუნაიტედი" ევროპა ლიგის ეგიდით გამართავს შეხვედრას, თუკი 1/8 ფინალში გავა.

მოურინიო მხოლოდ მომდევნო მატჩებზეა კონცენტრირებული და აცხადებს, რომ "ჩელსისთან" დაპირისპირებაზე მაშინ იფიქრებს, როცა ამის დრო მოვა.

"კენჭისყრასთან დაკავშირებით არავითარი რეაქცია არა მაქვს, რადგან "სენტ-ეტიენის" წინააღმდეგ უნდა ვითამაშო და მერე ფინალი მაქვს, რის შემდეგაც, იმედია, ევროპა ლიგაზე მომდევნო მეტოქე გვეყოლება. მე უნდა ვიბრძოლო პრემიერ ლიგის ოთხეულში მოსახვედრადაც, ასე რომ, ძალიან ბევრ რამეზე მიწევს ფიქრი.

"ჩელსი" კი მხოლოდ ინგლისის თასზე იფიქრებს, რადგან უკვე არის პრემიერ ლიგის ჩემპიონი, ჩემი აზრით, და მეტი არაფერი აქვთ სათამაშო, ამიტომაც მგონია, რომ ინგლისის თასი მათთვის მნიშვნელოვანია. ეს შეხვედრა ერთი თვის შემდეგ გაიმართება და ჯერ არ მინდა ამაზე ლაპარაკი", - განაცხადა "იუნაიტედის" მწვრთნელმა "ბლექბერნთან" გამარჯვების შემდეგ.

წყარო: manutd.com