"მანჩესტერ იუნაიტედის" ყოფილი ნახევამრცველი პოლ სქოულზი აცხადებს, რომ კმაყოფილია ჟოზე მოურინიოს გუნდის თამაშით და "წითლებს" სეზონის ბოლოს პრემიერ ლიგაში მინიმუმ მესამე ადგილის დაკავებას უწინასწარმეტყველებს.

სქოულზი ერთ-ერთი ყველაზე აქტიური კრიტიკოსი იყო ლუი ვან გაალისა, ჟოზე მოურინიოს წინამორბედისა და "იუნაიტედის" მთავარი მწვრთნელის პოსტზე. ინგლისელი აკრტიკებდა ჰოლანდიელის გუნდის არა მარტო შედეგებს, არამედ სათამაშო სტილსაც.

პორტუგალიელი სპეციალისტის ხელმძღვანელობით კი სქოულზი "იუნაიტედს" პროგრესირებას ამჩნევს და სატურნირო მდგომარეობის გაუმჯობესებას უწინასწარმეტყველებს.

"ბოლო რამდენიმე წელთან შედარებით შესამჩნევ პროგრესს ვხედავ. პირველი ორი-სამი თვე არ იყო კარგი, მაგრამ სიტუაციის დალაგება მოახერხეს. ისინი თამაშობენ ფეხბურთს, რომელიც გულშემატკივრებს სიამოვნებას ანიჭებს.

ერთადერთი პრობლემა ისაა, რომ მეექვსე ადგილზე იმყოფებიან, რაც მაწუხებს მათი ასეთი კარგი ფორმის ფონზე, მაგრამ ეჭვიც არ მეპარება, რომ ოთხეულში შევლენ.

პირველი ექვსეულის გუნდებს შორის, "ჩელსის" ჩათვლით, ისინი საუკეთესო ფეხბურთს თამაშობენ და მინდა, რომ მეორე ან მესამე ადგილზე გავიდნენ. პროგნოზი რომ გავაკეთო, მესამე ადგილს ავირჩევდი.

ჩემი აზრით, ოთხეულში "ჩელსი", "სიტი", "იუნაიტედი" და "არსენალი" ან "ლივერპული" შევლენ", - განაცხადა სქოულზმა.