ჟოზე მოურინიო აღნიშნავს, რომ ხუან მატას მდგომარეობა "მანჩესტერ იუნაიტედში" არასდროს ყოფილა საფრთხის ქვეშ.

როგორც კი დადასტურდა, რომ "იუნაიტედს" ჟოზე მოურინიო გაწვრთნიდა, ესპანელი ნახევარმცველის მომავალი მაშინვე სპეკულაციის საგანი გახდა, რასაც იმან შეუწყო ხელი, რომ პორტუგალიელმა მატა ერთხელ უკვე გაყიდა, როცა "ჩელსიში" მუშაობდა. ექსპერტები ამის საფუძველზე ფიქრობდნენ, რომ მოურინიოს სათამაშო ტაქტიკას ხუანი კვლავ ვერ მოერგებოდა.

მოურინიო კი თავის მხრივ ამ აზრს არ ეთანხმება და აცხადებს, რომ 28 წლის ფეხბურთელის მდგომარეობას "ჩელსისა" და "იუნაიტედში" სხვადასხვა სათამაშო სტილი განაპირობებდა.

"აქ რომ მოვედი, ხალხი ფიქრობდა, რომ მატას პრობლემები შეექმნებოდა. მე კი ვიცოდი, რომ პრობლემა სულაც არ იარსებებდა, რადგან ერთია სტილი, რომლითაც "ჩელსის" ვათამაშებდი და სულ სხვაა სტილი, რომლითაც "მანჩესტერ იუნაიტედი" უნდა მეთამაშებინა.

თავიდანვე ვიცოდი, რომ მნიშვნელოვანი ფეხბურთელი იქნებოდა და ვფიქრობ, ისიც გრძნობს ჩემს ამ თავდაჯერებულობას და გრძნობს ჩვენი სათამაშო სტილისადმი რწმენასაც, ამიტომაც ბედნიერია და თანაც ბედნიერია მოედანზე, რასაც მისი თამაშიდან გამომდინარე ხედავთ", - განაცხადა მოურინიომ.

წყარო: goal.com