დეილი ბლინდმა აღნიშნა, რომ "მანჩესტერ იუნაიტედმა" ყურადღება არ უნდა მოადუნოს, თუკი ოთხივე ტურნირზე ასპარეზობის გაგრძელება სურს, მაგრამ დარწმუნებულია, რომ კლუბი პრემიერ ლიგის ოთხეულში აუცილებლად მოხვდება სეზონის ბოლოს.

"იუნაიტედი" პრემიერ ლიგის მატჩს 4 მარტამდე არ გამართავს, მანამდე კი ჟოზე მოურინიოს შეგირდები ევროპა ლიგაზე, ლიგის თასზე და ინგლისის თასზე ითამაშებენ "სენტ-ეტიენის", "საუთჰემპტონისა" და "ბლექბერნ როვერსის" წინააღმდეგ, შესაბამისად.

ჰოლანდიელი "იუნაიტედის" ოფიციალურ ტელევიზიას "უოტფორდთან" გამარჯვების შემდეგ ესაუბრა: "ახლოს ვიქნებით და ყურადღება არ უნდა მოვადუნოთ, რომ ჩვენი თამაშები მოვიგოთ, მაგრამ დარწმუნებული ვარ, სეზონის ბოლოს ოთხეულში შევალთ."

26 წლის ფეხბურთელის თქმით, მიუხედავად იმისა, რომ "იუნაიტედს" გადატვირთული გრაფიკი აქვს და 10 დღეში მოუწევს 4 მატჩის ჩატარება, გუნდი გამოწვევისთვის მზად არის: "ფეხბურთელს ყოველთვის გსურს თამაში. ჯერ კიდევ ბევრი რამისთვის ბრძოლა შეგვიძლია, მათ შორის ფინალშიც, ასე რომ, მოუთმენლად ველით."

მიუხედავად იმისა, რომ მთელი ყურადღება ენტონი მარსიალსა და ხუან მატას, "უოტფორდთან" გატანილი გოლების ავტორებს მიექცა, საგულისხმოა ისიც, რომ "იუნაიტედი" ოთხი მატჩია გოლს არ უშვებს.

"ყოველთვის სასიამოვნოა "მშრალი" მატჩის ჩატარება და მცველების თავდაჯერებულობის ამაღლება. ძალიან ბევრი კრეატიული და მწვავე ფეხბურთელი გვყავს. ბედნიერი ვარ, რომ ამ ფეხბურთელების თანაგუნდელი ვარ."

მოგებული მატჩის მიუხედავად "წითლებს" გაცილებით მეტი გოლის გატანა და თამაშის უფრო ადრე მოკვლა შეეძლოთ, რასაც ბლინდი დიდ საჭიროებად მიიჩნევს.

"შანსების გამოყენება სასურველია. ენტონის მეორე გოლი კარგი და დამსახურებული იყო. გამარჯვება დავიმსახურეთ და ბევრი შანსი შევქმენით. უფრო მეტის გამოყენებაც შეგვეძლო; ყველა ბურთს ითხოვდა. მეორე ტაიმში ოდნავ გაგვიჭირდა, რადგან მათ სისტემა შეცვალეს, მაგრამ საერთო ჯამში კარგი გამარჯვება მოვიპოვეთ."

წყარო: manutd.com