"მანჩესტერ იუნაიტედი" გაუშვებს აპლიკაციას, რომელიც ინგლისის გარეთ მყოფ გულშემატკივრებს კლუბის ოფიციალური ტელევიზიისთვის 24-საათიან რეჟიმში თვალის დევნების საშუალებას მისცემს. ყოველთვიური გადასახადი 1.49 ფუნტიდან 4.49 ფუნტამდე თანხას შეადგენს.

ინვესტორების წინაშე გამოსვლისას "იუნაიტედის" აღმასრულებელმა დირექტორმა ედ ვუდვორდმა განაცხადა: "MUTV-ს აპლიკაციის გაშვებას იმ ტერიტორიაზე ვგეგმავთ, სადაც ეს ნებადართულია. ფასიანი მომსახურება იქნება და თვეში 1.49 ფუნტიდან 4.49 ფუნტამდე ეღირება.

მოცემული აპლიკაციის საშუალებით შესაძლებელი იქნება ჩვენი სადღეღამისო ტელეარხის პირდაპირი ტრანსლირება და ასევე წვდომა ყველა განახლებაზე, პროგრამის ბაზაზე, დოკუმენტურ ფილმებზე, სხვადასხვა შოუებზე, უახლოესი წარსულის მატჩებზე, მიმოხილვასა და კლასიკურ მატჩებზე.

აპლიკაცია ხელმისაწვდომი არ იქნება დიდ ბრიტანეთში, რისი მიზეზიც პრემიერ ლიგის მოქმედი ლიცენზიით გამოწვეული შეზღუდვებია. ასევე მიუწვდომელი იქნება იმ რიგ ქვეყნებში, სადაც ჩვენს პარტნიორებთან გარკვეული შეთანხმება გვაქვს. მაგრამ 160-ზე მეტ ქვეყანაში კი იმუშავებს. გვჯერა, რომ ასეთი ტიპის საქმიანობის მობილური კონტენტი უახლოეს წლებში მხოლოდ გაიზრდება".

შეგახსენებთ, რომ საკლუბო ტელევიზია არ აჩვენებს პირველი გუნდის თამაშებს პირდაპირ ეთერში. MUTV-ზე მხოლოდ 23-წლამდელთა და 18-წლამდელთა გუნდის მატჩების ყურებაა შესაძლებელი და ასევე პირველი გუნდის წინასასეზონო ტურნეს მატჩები.