"მანჩესტერ იუნაიტედის" ნახევარმცველი ხუან მატა აცხადებს, რომ გუნდისთვის ძალიან მნიშვნელოვანია გოლის გამტანი რამდენიმე ფეხბურთელის ყოლა და ზლატან იბრაჰიმოვიჩს მისი თანაგუნდელებიც უნდა დაეხმარნონ.

"ლესტერ სიტისთან" 3-0 მოგებულ მატჩში შვედმა თავდამსხმელმა თავისი გოლების რაოდენობა 20-ს გაუტოლა, ხოლო შეხვედრის დანარჩენი ორი გოლი მატამ და მატჩის საუკეთესო ფეხბურთელმა, ჰენრიხ მხითარიანმა გაიტანეს.

"დღეს შანსები გამოვიყენეთ, რაც ძალიან მნიშვნელოვანი იყო. სწორედ ამას უნდა ვახერხებდეთ. წინა თამაშში კონკურენტებთან ჩამორჩენის შემცირება შეგვეძლო, მაგრამ ვერ მოვახერხეთ. დღეს კი პირიქით."

ჟოზე მოურინიოს გუნდს 15-მატჩიანი წაუგებელი სერია აქვს პრემიერ ლიგაში. "ლესტერთან" ბოლო მატჩი კი გუნდმა ჰენრიხ მხითარიანის მიერ გატანილი გოლითა საგოლე გადაცემის დახმარებით მოიგო.

"ძალიან კარგი, დიდებული ფეხბურთელია და ადვილია მისი თამაშის სტილის გაგება, რადგან მეტ-ნაკლებად ისე თამაშობს, როგორც მე.

ერთმანეთს ძალიან კარგად ვუგებთ, მაგრამ მხოლოდ ჩვენი კი არა, მთელი გუნდის დამსახურებაა და ბედნიერი ვარ, რომ ასე კარგად ვითამაშეთ.

ჩემთვის და მიკისთვის ძალიან მნიშვნელოვანი იყო გოლის გატანა, რადგან ზლატანს ისედაც ბევრი გააქვს და ჩვენი მხრივ ჩვენც გვჭირდება გოლები.

გოლები გაგვაქვს, შანსებს ვქმნით და დღეს მოედანზე სიამოვნება მივიღეთ, რასაც შექმნილმა სივრცეებმა შეუწყო ხელი."

მატა, რომელმაც ჩემპიონატში გატანილი თავისი გოლები ხუთამდე აიყვანა, მოხარულია, რომ მისმა გუნდმა მომენტების გამოყენება შეძლო.

"ფეხბურთში ერთ-ერთი ყველაზე მნიშვნელოვანია მომენტების შექმნა და მათი გამოყენება. როგორც კი 3-0 იგებ, კომფორტულად გრძნობ თავს. ვიცი, რომ ბურთს კარგად ვაკონტროლებდით, მაგრამ პირველ გოლამდე ძალიან გვიჭირდა. ვფიქრობ, კარგად ვთამაშობდით, ბურთს მშვიდად ვაკონტროლებდით და თავსაც კარგად ვიცავდით.

კარის სიახლოვეს ეფექტურობა ყოველთვის მნიშვნელოვანია. რამდენიმე შანსი მაინც გავუშვით ხელიდან, მაგრამ 3-0 საკმარისზე მეტია. საქმე მხოლოდ თამაშის მოგებაში კი არა, თავდაჯერებულობის შეძენაშიც იყო და ვფიქრობ, ამაზე დაფუძნება შეგვიძლია."

წყარო: manutd.com